Prezident Shavkat Mirziyoyev Imom Buxoriy yodgorlik majmuasida bo‘lib, O‘zbeksiton xalqini muborak Ramazon oyi bilan muborakbod etdi, deb xabar beradi Prezident matbuot xizmati.
Davlat rahbari Samarqand viloyatiga tashrifi davomida Imom Buxoriy majmuasida qurilayotgan ziyoratgoh loyihalari bilan tanishdi.
“Ramazon oyi – ezgu niyatlar ijobat bo‘ladigan muqaddas oy. Bu qurilishni shu oyda boshlayotganimiz ham xayrli, xosiyatli bo‘ladi, qalbimizga taskin beradi. Bu sohada qilayotgan ishlarimizdan maqsad – islomga e’tiqodimizni, alloma bobolarimizga hurmatimizni ilm bilan bildirish. Ajdodlarimizga munosib bo‘lish biz uchun juda katta burch”, – deydi Shavkat Mirziyoyev.
O‘tgan yili pandemiya tufayli Ramazon oyida diniy amallarni uyda bajarishga to‘g‘ri kelgani yodga olingan. Bu yil esa masjidlar ochiq, mo‘min-musulmonlar karantin qoidalariga qat’iy amal qilib, ibodatlarini ado etmoqda. Keksalar, nogiron va yordamga muhtoj insonlar, kam ta’minlagan oilalarga beg‘araz ko‘mak ko‘rsatilmoqda. Ayniqsa, butun dunyo og‘ir inqirozni boshidan kechirayotgan hozirgi murakkab vaziyatda bu juda muhimligi ta’kidlandi.
“Muqaddas dinimiz bizni insonparvarlikni, tinchlik va osoyishtalikni qadrlab yashashga, mehr-oqibatli bo‘lishga da’vat etadi. Mana shunday tushuncha va qarash bilan har bir oila va mahallada, butun jamiyatimizda tinchlik, do‘stlik va hamjihatlikni mustahkamlashga erisha olamiz. Takror aytaman, tinchlik va sog‘liq bo‘lsa, qolgan hamma narsa bo‘ladi”, – deya ta’kidlagan Prezident.
Eslatib o‘tamiz, O‘zbekistonda Ramazon oyining 13-apreldan boshlandi, mamlakatdagi 1400 ga yaqin masjidda Qur’oni karim xatm qilinmoqda.
Izoh (0)