Президент Шавкат Мирзиёев Имом Бухорий ёдгорлик мажмуасида бўлиб, Ўзбекситон халқини муборак Рамазон ойи билан муборакбод этди, деб хабар беради Президент матбуот хизмати.
Давлат раҳбари Самарқанд вилоятига ташрифи давомида Имом Бухорий мажмуасида қурилаётган зиёратгоҳ лойиҳалари билан танишди.
«Рамазон ойи – эзгу ниятлар ижобат бўладиган муқаддас ой. Бу қурилишни шу ойда бошлаётганимиз ҳам хайрли, хосиятли бўлади, қалбимизга таскин беради. Бу соҳада қилаётган ишларимиздан мақсад – исломга эътиқодимизни, аллома боболаримизга ҳурматимизни илм билан билдириш. Аждодларимизга муносиб бўлиш биз учун жуда катта бурч», – дейди Шавкат Мирзиёев.
Ўтган йили пандемия туфайли Рамазон ойида диний амалларни уйда бажаришга тўғри келгани ёдга олинган. Бу йил эса масжидлар очиқ, мўмин-мусулмонлар карантин қоидаларига қатъий амал қилиб, ибодатларини адо этмоқда. Кексалар, ногирон ва ёрдамга муҳтож инсонлар, кам таъминлаган оилаларга беғараз кўмак кўрсатилмоқда. Айниқса, бутун дунё оғир инқирозни бошидан кечираётган ҳозирги мураккаб вазиятда бу жуда муҳимлиги таъкидланди.
«Муқаддас динимиз бизни инсонпарварликни, тинчлик ва осойишталикни қадрлаб яшашга, меҳр-оқибатли бўлишга даъват этади. Мана шундай тушунча ва қараш билан ҳар бир оила ва маҳаллада, бутун жамиятимизда тинчлик, дўстлик ва ҳамжиҳатликни мустаҳкамлашга эриша оламиз. Такрор айтаман, тинчлик ва соғлиқ бўлса, қолган ҳамма нарса бўлади», – дея таъкидлаган Президент.
Эслатиб ўтамиз, Ўзбекистонда Рамазон ойининг 13 апрелдан бошланди, мамлакатдаги 1400 га яқин масжидда Қуръони карим хатм қилинмоқда.
Изоҳ (0)