Namangan viloyatining Chortoq tumanidan oqib o‘tgan “Katta Namangan kanali”dan 5-sinf o‘quvchisining jasadi topilgani va qotillikda uning kelinoyisi gumonlanayotgani to‘g‘risida xabar berilgandi. “Sevimli” telekanalining “Zamon” dasturida ma’lum qilinishicha, fojiaga oilada yuzaga kelgan mojaro sabab bo‘lgan.
Ma’lumotlarga ko‘ra, 5-aprel kuni 47-sonli maktabning 5-sinf o‘quvchisi M.A. 2-soat darsdan so‘ng, yaqin qarindoshi tomonidan olib ketilgan va maktabga qaytib kelmagach, uni bedarak yo‘qolgani haqida xabarlar tarqalgan. Maktab ma’muriyati shu kuni soat 16:00 larda IIBga murojaat qilgan.
Holat yuzasidan Chortoq tumani prokuraturasi tomonidan tergovga qadar tekshiruv harakatlari o‘tkazilib, voyaga yetmagan fuqaroning yo‘qolgani shubhali tuyulgani sabab Jinoyat kodeksining 97-moddasi 2-qismi bilan jinoyat ishi qo‘zg‘atilgan.
Huquq-tartibot idoralari tomonidan olib borilgan tekshiruvlar natijasida qizchani maktabdan uning kelinoyisi olib ketgani ma’lum bo‘lgan.
Ta’kidlanishicha, marhuma qizning buvisi kelinlari ahil yashashini, oralarida biror marta nizo bo‘lmaganini ta’kidlab, jinoyatga qo‘l urgan kelinining oilada o‘g‘rilik qilganini va shu sababli eri undan kechmoqchi bo‘lganini aytgan.
“Bu kelinim o‘g‘rilik qilgan. O‘g‘lim shundan so‘ng uni kechirmagan, o‘g‘rini xotin qilmayman, degan. Kenja kelinim edi. Hammasiga eri sababchi, u kelinim bilan yashamayman degandi. Lekin ovsini bilan biror marta urishmagan. Bunga oilaviy mojaro sabab bo‘lgan”, — deydi qizchaning buvisi.
Avvalroq Xorazmda qiziga ruhiy zo‘ravonlik qilgan ota 5 sutkaga qamalgani, Toshkent viloyatida 14 yoshli qizning nomusiga tegganlikda gumonlanayotgan shaxs qamoqqa olingani to‘g‘risida xabar berilgandi.
Izoh (0)