O‘zbekiston Oliy Majlisi Qonunchilik palatasi binosining fasadini rekonstruksiya qilish va binoni ta’mirlash uchun 16,54 milliard so‘m (Markaziy bankning 13-apreldagi kursiga ko‘ra, qariyb 1,57 million dollar) miqdorida mablag‘ ajratilishi rejalashtirilgan. Bu haqda “Gazeta.uz” davlat xaridlari portalida mavjud ma’lumotlarga tayanib, xabar berdi.
Portalda e’lon qilingan ma’lumotlarga ko‘ra, Qonunchilik palatasining binosidan foydalanish boshqarmasi 2021-yilning 10-fevralida “Trest-12” AJ bilan shartnoma imzolagan.
Amalga oshiriladigan ishlar, taxminan, 16,54 milliard so‘mga baholanmoqda. Ushbu mablag‘lar davlat budjetidan moliyalashtiriladi. Bajarilgan ishlarning haqiqiy miqdori va pudratchining xarajatlariga ko‘ra, sarflangan mablag‘larga aniqlik kiritiladi.
Portaldagi mavjud hujjatlarga muvofiq, Vazirlar Mahkamasining 2020-yil 29-noyabrdagi 505-f-sonli buyrug‘iga binoan loyihani tendersiz amalga oshirish va parallel ravishda obyektni loyihalashtirishga ruxsat berilgan. Ishlarni 2021-yilning iyun oyida yakunlash reja qilingan.
Avvalroq Toshkentning Sharof Rashidov ko‘chasidagi (Mustaqillik maydoni yonida) ma’muriy bino rekonstruksiyasi va favvora ostiga avtoturargoh qurilishiga 431,5 milliard so‘m sarflanishi mumkinligi ma’lum bo‘lgandi. Ushbu loyiha pudratchisi sifatida ham aksionerlari orasida qurilish vazirining o‘g‘li va rafiqasi bo‘lgan “Trest-12” AJ tanlangan.
Qonunchilik palatasining boshqa davlat xaridlari
2020-yilning 1-iyulida Qonunchilik palatasining binosidan foydalanish boshqarmasi Prezident administratsiyasining qurilish birlashmasi (PA QB) bilan shartnoma imzolagan. Kelishuv quyi palata binosini kapital ta’mirlash, hududni obodonlashtirish, tashqi yoritish, mebel va jihozlar bilan ta’minlashni nazarda tutadi (I bosqich). Ishlar qiymati 15,1 milliard so‘m etib baholangan.
Boshqarma 2021-yilning 29-martida Qonunchilik palatasi binosini isitish, ventilyatsiya, havo sovitish uskunalarini o‘rnatish va aloqa tizimlarini mukammal ta’mirlash uchun PA QB bilan yana bir shartnomani tuzgan. Loyiha miqdori 47,7 milliard so‘m etib baholangan. Mazkur lot uchun davlat xaridlari saytiga yuklangan hujjatlar bo‘m-bo‘sh bo‘lib chiqqan.
Izoh (0)