AQSh davlat kotibi Entoni Blinken 14-aprel kuni AQSh va NATO o‘z qo‘shinlarini Afg‘onistondan uyiga olib kelish vaqti kelganini ma’lum qildi.U bu haqda NATO bosh kotibi Yens Stoltenberg bilan uchrashish uchun alyans bosh idorasiga kelganida aytdi, deb yozadi “TASS”.
“Biz NATO bilan Afg‘onistonga birgalikda kirgandik, endi o‘z qo‘shinlarimizni uyga qaytarish vaqti keldi”, — dedi Blinken. Kunning ikkinchi yarmida Bryusselda NATO tashqi ishlar va mudofaa vazirlarining shoshilinch videokonferensiyasi bo‘lib o‘tadi, unda AQSh davlat kotibi va Pentagon rahbari qariyb 20 yillik urushdan so‘ng NATO harbiy kuchlarini Afg‘onistondan olib chiqish strategiyasini e’lon qilishi kutilmoqda.
AQShning Tolibon bilan tuzgan 2020-yilgi kelishuviga ko‘ra, AQSh va NATO 2021-yil 1-mayga qadar Afg‘onistondan o‘z qo‘shinlarini olib chiqishni boshlashi kerak. Shu bilan birga, Afg‘onistondagi vaziyat faqat og‘irlashmoqda. Vashington bu mamlakatdan qo‘shinlarning olib chiqib ketilishi Kobuldagi hukumatning qulashiga olib kelishi mumkinligidan qo‘rqmoqda, shunday bo‘lgan taqdirda, mamlakatda kechgan deyarli 20 yillik urush natijalari bekor ketadi.
Vashington ma’muriyati vakili 13-aprel kuni ma’lum qilganidek, AQSh prezidenti Jo Bayden 11-sentabrga qadar AQSh qo‘shinlarini Afg‘onistondan butunlay olib chiqib ketmoqchi, qo‘shinlarni olib chiqish harakati 1-maygacha boshlanishi kutilmoqda. Endilikda AQSh NATOdagi ittifoqchilari bilan chiqib ketish tartibini kelishib olishi kerak.
AQShning Afg‘onistondagi harbiy operatsiyasi 2001-yil oktabridan beri davom etmoqda va Amerika tarixidagi eng uzoq muddatli harbiy kampaniyaga aylangan. 2010—2013-yillarda Afg‘onistondagi G‘arb kuchlari soni eng yuqori cho‘qqisiga chiqib, 150 ming kishidan oshgan. AQSh va NATOning asosiy jangovar kuchlari 2014-yilda Afg‘onistondan chiqarilgan.
Izoh (0)