Bitkoin narxi kriptovalyuta tarixida birinchi marta 64 ming dollardan oshdi. Bu haqda CoinDesk portalining ma’lumotlarida keltirib o‘tildi.
Toshkent vaqti bilan soat 10:14 da bitkoin 64,33 ming dollardan sotila boshladi. So‘nggi bir kecha-kunduzda bitkoin 6,28 foizga qimmatlashdi. Kriptovalyutaning bozor kapitallashuvi 1,2 trillion dollarga yetdi, kunlik savdo hajmi 73,97 milliard dollarni tashkil qildi.
CoinDesk tahlilchisi Damanik Dantes ilgari izohlab berganidek, birinchi kriptovalyuta uch oy davom etgan konsolidatsiya bosqichini yakunladi. Uning fikriga ko‘ra, o‘sish tendensiyasi davom etadi va keyingi barqarorlik darajasi 68-70 ming dollarni tashkil etadi.
13-mart kungi savdolar chog‘ida bitkoin narxi birinchi marta 60 ming dollardan oshgan edi. 2-yanvar kuni bitkoin kursi 32 ming dollarlik chegaradan o‘tib, savdo sessiyasi davomida bitkoin qiymati 32 700 dollarni tashkil etgan. Dekabr o‘rtalarida bitkoin narxi 5 ming dollarga oshgan edi. 16-dekabr kuni kriptovalyuta qiymati birinchi bor bir sutkada 12 foizga qimmatlashib, 20 minglik chegaradan o‘tib ketgan. 21-dekabr kuni bitkoin kursi 24 ming dollardan oshgan, keyingi bir necha kun davomida esa 24,6 ming dollarlik oraliqda saqlangan. 26-dekabr kuni esa bitkoin narxi birinchi bor 25 ming dollardan oshib ketgandi.
Eslatib o‘tamiz, bitkoin 2017-yilda kriptovalyutalarga qiziqishning oshishi fonida bir yilda 20 baravar qimmatladi, shundan keyin uning kursi tezlik bilan pasayishni boshlagan. 2018-yilning iyun oyida bitkoin narxi 6 ming dollardan qimmatroq bo‘lgan, 2019-yilning boshida esa uning narxi 3,5 ming dollargacha pasaygan. Shundan so‘ng bitkoin narxi yana oshishni boshlagan.
Izoh (0)