Rossiya prezidenti Vladimir Putin 14-aprel kuni koronavirusga qarshi vaksinaning ikkinchi dozasini qabul qildi. Bu haqda u Rossiya geografik jamiyatining Vasiylik kengashi yig‘ilishida ma’lum qildi, deb yozadi Meduza.
“Sizga shuni ma’lum qilamanki, hozirgina, ushbu xonaga kirishdan oldin men ham vaksinaning ikkinchi dozasini oldim. Umid qilamanki, hammasi yaxshi bo‘ladi. Yo‘q, umid emas, bunga aminman”, — dedi Putin.
Prezident yig‘ilishdagi “o‘zi va yaqinlariga g‘amxo‘rlik qiladigan” ishtirokchilarning ham vaksina olishiga umid bildirdi.
23-mart kuni Putin koronavirusga qarshi vaksinaning birinchi dozasi bilan emlangan edi. Putin omma oldida emlanishdan bosh tortgan. Peskov prezident “kameralar nishoni ostida” vaksina olishni yoqtirmasligini aytgandi. Prezident matbuot kotibi Putin “vaksinalar targ‘iboti uchun shundoq ham ko‘p narsa qilayotgani”ni ta’kidlagan.
Nega u boshqa davlatlarning yetakchilari singari jurnalistlar oldida emlanmagani haqidagi savolga Putinning o‘zi shunday javob berdi: “Xo‘sh, biz ham maymun o‘ynatishimiz kerakmi nima? Qayerdadir kimlarnidir qilgan ishini tarkrorlashimiz kerakmi? Menimcha, yo‘q. Axir, bunday darajada kimdir biror narsani soxtalashtirmoqchi bo‘lsa, kimnidir aldashni xohlasa, buni qilish qiyin emas”.
Putin qaysi vaksina bilan emlangani noma’lum. Kreml bu ma’lumotni oshkor qilishdan bosh tortdi. Kreml Vladimir Putinning vaksina olish to‘g‘risidagi qaroridan keyin mamlakatda koronavirusga qarshi emlash sur’atining oshishiga umid qilmoqda.
Avval mart boshida davlat rahbarlaridan Ukraina prezidenti Vladimir Zelenskiy koronavirusga qarshi emlangani, Hindiston bosh vaziri Narendra Modi koronavirusga qarshi mamlakatda ishlab chiqarilgan COVAXIN vaksinasining birinchi dozasini olgani, shuningdek, dunyoning eng badavlat kishilaridan biri, Berkshire Hathaway bosh direktori Uorren Baffet Pfizer/BioNTech kompaniyasining vaksinasi bilan koronavirusga qarshi emlangani haqida xabarlar berilgan.
Fevral oyida Turkiya prezidenti Rajab Toyyib Erdo‘g‘on unga koronavirusga qarshi vaksinaning ikkinchi dozasi yuborilganini ma’lum qilgan, u vaksinaning birinchi dozasini 14-yanvarda qabul qilib olgandi.
Bundan avval Shahzoda Charlz va uning rafiqasi, BMT bosh kotibi, milliarder Bill Geyts, Argentina prezidenti hamda Janubiy Koreya prezidenti va uning rafiqasi koronavirus vaksinasi bilan emlangan.
Izoh (0)