АҚШ давлат котиби Энтони Блинкен 14 апрель куни АҚШ ва НАТО ўз қўшинларини Афғонистондан уйига олиб келиш вақти келганини маълум қилди.У бу ҳақда НАТО бош котиби Йенс Столтенберг билан учрашиш учун альянс бош идорасига келганида айтди, деб ёзади «ТАСС».
«Биз НАТО билан Афғонистонга биргаликда киргандик, энди ўз қўшинларимизни уйга қайтариш вақти келди», — деди Блинкен. Куннинг иккинчи ярмида Брюсселда НАТО ташқи ишлар ва мудофаа вазирларининг шошилинч видеоконференцияси бўлиб ўтади, унда АҚШ давлат котиби ва Пентагон раҳбари қарийб 20 йиллик урушдан сўнг НАТО ҳарбий кучларини Афғонистондан олиб чиқиш стратегиясини эълон қилиши кутилмоқда.
АҚШнинг Толибон билан тузган 2020 йилги келишувига кўра, АҚШ ва НАТО 2021 йил 1 майга қадар Афғонистондан ўз қўшинларини олиб чиқишни бошлаши керак. Шу билан бирга, Афғонистондаги вазият фақат оғирлашмоқда. Вашингтон бу мамлакатдан қўшинларнинг олиб чиқиб кетилиши Кобулдаги ҳукуматнинг қулашига олиб келиши мумкинлигидан қўрқмоқда, шундай бўлган тақдирда, мамлакатда кечган деярли 20 йиллик уруш натижалари бекор кетади.
Вашингтон маъмурияти вакили 13 апрель куни маълум қилганидек, АҚШ президенти Жо Байден 11 сентябрга қадар АҚШ қўшинларини Афғонистондан бутунлай олиб чиқиб кетмоқчи, қўшинларни олиб чиқиш ҳаракати 1 майгача бошланиши кутилмоқда. Эндиликда АҚШ НАТОдаги иттифоқчилари билан чиқиб кетиш тартибини келишиб олиши керак.
АҚШнинг Афғонистондаги ҳарбий операцияси 2001 йил октябридан бери давом этмоқда ва Америка тарихидаги энг узоқ муддатли ҳарбий кампанияга айланган. 2010—2013 йилларда Афғонистондаги Ғарб кучлари сони энг юқори чўққисига чиқиб, 150 минг кишидан ошган. АҚШ ва НАТОнинг асосий жанговар кучлари 2014 йилда Афғонистондан чиқарилган.
Изоҳ (0)