Turkiyada COVID-19’ga chalinish holatlari soni bo‘yicha yangi rekord o‘rnatildi. Bu haqda mamlakat Sog‘liqni saqlash vazirligining ma’lumotlariga tayanib O‘zbekistonning Istanbuldagi Bosh konsulxonasi xabar berdi.
Xabarga ko‘ra, o‘tgan bir kecha-kunduzda Turkiyada 59187 kishida koronavirus infeksiyasi qayd etildi, 52104 kishi kasallikdan tuzaldi, 273 kishi vafot etdi. Pandemiya boshidan buyon kasallanganlarning umumiy soni 3,96 million kishini tashkil etdi, infeksiya oqibatidagi o‘limlar — 34 455, sog‘ayganlar — 3,4 million.
Turkiyada mart oyining oxirida koronavirus qayta avj ola boshladi. Shundan so‘ng mamlakat prezidenti Toyyib Rajab Erdo‘g‘on 58 ta shaharni COVID-19 yuqtirish xavfi yuqori bo‘lgan qizil hudud, deya e’lon qildi. Mazkur shaharlarda Turkiya aholisining 80 foizi istiqomat qiladi.
Shuningdek, Erdo‘g‘on Turkiya hukumati Ramazon oyining dastlabki ikki haftasida koronavirusga qarshi cheklov choralarini kuchaytirishini ma’lum qildi.
Mamlakatda 14-aprel, chorshanba kunidan boshlab komendantlik soati davomiyligi uzaytirilib, u ish kunlari soat 19:00 dan (ilgari 21:00 dan edi) ertalab soat 05:00 gacha amal qiladigan bo‘ldi, bu vaqtda ko‘chaga chiqish taqiqlanadi. Avvalroq, rasmiylar 12-apreldan boshlab dam olish kunlari uchun to‘liq komendantlik soati kiritgan edi, ushbu chora o‘z kuchida qoladi.
Restoran va kafelar faqat yetkazib berish va olib ketish rejimida ishlaydi, sport zallari Ramazon oyining oxirigacha yopiq bo‘ladi. Shuningdek, rasmiylar shaharlararo transportni taqiqlashni joriy qildi, bu istisno holatlarga ta’sir qilmaydi.
Bundan tashqari, Turkiyada jamoat transporti uchun cheklovlar kuchga kiradi va barcha yopiq binoda o‘tkaziladigan mashg‘ulotlar taqiqlanadi. Ayrim o‘quvchi va talabalar masofaviy ta’limga qaytadi.
Turkiya sog‘liqni saqlash vaziri Faxriddin Koja mamlakat koronavirus pandemiyasining eng qiyin davrlardan birini boshdan kechirayotganini aytgandi. Vazir mamlakatning barcha hududlarida kasallanish o‘sib borayotganini ta’kidladi. Faxriddin Koja Turkiyadagi COVID-19 bilan bog‘liq vaziyatni baholash uchun mamlakatga Rossiya delegatsiyasining tashrif buyurishini ma’lum qildi.
Avvalroq Rossiya 15-apreldan 1-iyungacha Turkiyaga doimiy va charter reyslarni to‘xtatishi haqida e’lon qilgandi. Shuningdek, Rossiya bilan bir qatorda Xitoy va boshqa mamlakatlar ham Turkiya bilan parvozlarni to‘xtatishga qaror qildi. Xitoyning fuqaro aviatsiyasi ma’muriyati (CAAC) turk aviakompaniyalariga 19-apreldan boshlab to‘rt hafta davomida parvozlarni to‘xtatishga buyruq berilganini e’lon qildi.
O‘zbekiston Turkiya bilan parvozlarni hali to‘xtatmagan. Mart oyining oxirida Samarqand—Istanbul—Samarqand yo‘nalishi bo‘yicha muntazam reyslar tiklangan edi.
Izoh (0)