Ozarbayjonning Boku va Agdam shaharlarida Turkiy Kengash doirasidagi axborot va media sohasida yig‘ilish bo‘lib o‘tdi. Unda Prezident Administratsiyasi huzuridagi AOKA direktori Asadjon Xo‘jayev rahbarligida O‘zbekiston delegatsiyasi ishtirok etdi.
“Gazeta.uz”ning ma’lum qilishicha, Asadjon Xo‘jayev mahalliy OAVlarga bergan intervyusida Agdam shahridagi holatga to‘xtalib, “Bu yerda bitta masjiddan tashqari deyarli hamma narsa vayron qilingan: uylar, infratuzilma. Jahon hamjamiyati bunga e’tibor qaratishi kerak”, — deb aytgan.
Agentlik direktori Turkiy kengash davlatlari Ozarbayjonda olib boriladigan qurilish ishlarida faol ishtirok etishini ta’kidlagan. Shuningdek, u O‘zbekiston ushbu hududlarni va infratuzilmani tiklashda o‘z yordamini taklif qilganini eslatgan.
“Ayni paytda biz mutaxassislar bilan qayta tiklash lozim bo‘lgan obyektlar ro‘yxatini belgilab olmoqdamiz va bizning quruvchilarimiz bunda qatnashishga keladi. Mening bilishimcha, bitta maktabni qurish to‘g‘risida kelishuv mavjud bo‘lib, u Ozarbayjon xalqiga O‘zbekistondan tuhfa sifatida taqdim etiladi. Yaqin orada hamkorligimiz natijalarini ko‘ramiz, degan umiddaman. Va eng asosiysi Tog‘li Qorabog‘ hududiga tinchlik keldi”, — degan Xo‘jayev.
Eslatib o‘tamiz, 2020-yilning sentabr oyi oxirida Tog‘li Qorabog‘da Ozarbayjon va Armaniston davlatlari o‘rtasida qurolli nizo kelib chiqqan edi. 2020-yilning 10-noyabrida o‘t ochishni to‘xtatish to‘g‘risidagi uch tomonlama kelishuv imzolanishi bilan nizolar yakuniga yetdi. Unga ko‘ra, Boku Tog‘li Qorabog‘ bilan qo‘shni yetti viloyat, shuningdek, Shusha va Gadrut shaharlari ustidan nazoratni qayta tikladi. Hududning qolgan qismiga Rossiya tinchlikparvarlari joylashtirildi.
Avvalroq Shavkat Mirziyoyev O‘zbekiston Tog‘li Qorabog‘ zaminidagi ko‘hna obidalar, madaniyat va ma’rifat maskanlarini tiklash ishlariga hissa qo‘shishga tayyor ekanini bildirgan edi.
Izoh (0)