Toshkent viloyati Quyi Chirchiq tumanida 21 yoshli qizni olib qochib ketib, uni nikohdan o‘tishga majburlagan qozoq millatiga mansub shaxsga nisbatan jinoiy ish ochildi, deya xabar qilmoqda Tergov departamenti.
Ma’lum qilinishicha, 2021-yilning 12-mart kuni soat 07:55 larda qozoq millatiga mansub bo‘lgan fuqaro 27 yoshli M.Q. Quyi Chirchiq tumani Do‘stlik-1 mahallasi hududida bo‘la turib, avvaldan telefon orqali gaplashib yurgan tanishi 21 yoshli U.M.ni erkiga xilof ravishda nikohdan o‘tish uchun o‘g‘irlab, o‘zining yashash xonadoniga olib borib, u bilan nikohdan o‘tishga majburlagan.
Lekin U.M. qarshilik ko‘rsatib qochib ketib, unga nisbatan qonuniy chora ko‘rishlarini so‘rab IIBga ariza bilan murojaat qilgan.
Mazkur holat yuzasidan Quyi Chirchiq tuman IIB huzuridagi Tergov bo‘limi tomonidan M.Q.ga nisbatan Jinoyat kodeksining 136-moddasi 1-qismi (ayolni erga tegishga majbur qilish yoki uning erga tegishiga to‘sqinlik qilish) bilan jinoyat ishi qo‘zg‘atilgan.
Hozirda tergov harakatlari olib borilmoqda.
Ta’kidlanishicha, bu turdagi jinoyatlar uchun Jinoyat kodeksining normalariga ko‘ra bazaviy hisoblash miqdorining 25 baravarigacha miqdorda jarima yoki 360 soatgacha majburiy jamoat ishlari yoki 3 yilgacha axloq tuzatish ishlari yoxud 1 yildan 3 yilgacha ozodlikni cheklash yoki 3 yilgacha ozodlikdan mahrum qilish jazosi tayinlanadi.
Bundan avval Jizzaxda maktab o‘quvchisini zo‘rlagan shaxs jinoyati 20 yil o‘tib fosh bo‘lgani, Toshkent viloyatida 14 yoshli qizning nomusiga tegganlikda gumonlanayotgan shaxs qamoqqa olingani ma’lum qilingani hamda Namanganda ikki yigit tomonidan olib qochilgan 16 yoshli qiz o‘zini mashinadan tashlab halok bo‘lgani haqida xabar berilgandi.
Izoh (0)