Namanganda bog‘chada tanasining 70 foizi qaynoq suvdan kuygan bola vafot etgani hamda hodisa ro‘y berganidan ikki oy o‘tib jinoyat ishi qo‘zg‘atilgani haqida xabar berilgandi. Ushbu voqea yuzasidan Maktabgacha ta’lim vazirligi rasmiy munosabat bildirdi.
Ma’lum qilinishicha, marhum Ulug‘bek Hoshimovning ota-onasi yo‘llagan murojaatdan so‘ng holat vazirlik ishchi guruhi tomonidan o‘rganilgan.
Natijada bola tarbiyalangan guruhda ishlagan barcha xodimlar lavozimidan ozod etilgan.
Tergov natijalariga ko‘ra, xodimlar o‘z vazifalariga sovuqqonlik bilan qaraganligi va tashkilotda xavfsizlik standartlariga rioya qilinmaganligi uchun 7-aprel kuni maxsus bog‘cha direktori, katta hamshirasi va qo‘riqchisi bilan mehnat shartnomalari bekor qilingan.
Vazirlik holat yuzasidan qonunchilikda belgilangan jazo tayinlashi tarafdori ekani ta’kidlangan.
Bundan avval Farg‘onada bog‘cha bolalarini tinchlantirish uchun temir qoshiqdan foydalanib, 4 yoshli bolaning bir ko‘zidan ayrilishiga sababchi bo‘lgan tarbiyachiga sud hukmi o‘qilgani, Surxondaryoda bolalarga qo‘pol munosabatda bo‘lgan tarbiyachi ishdan bo‘shatilgani hamda Qonliko‘lda tarbiyachilarning norozilik aksiyasidan so‘ng bog‘cha mudirasi lavozimidan chetlashtirilgani haqida xabar berilgandi.
Izoh (0)