Озарбайжоннинг Боку ва Агдам шаҳарларида Туркий Кенгаш доирасидаги ахборот ва медиа соҳасида йиғилиш бўлиб ўтди. Унда Президент Администрацияси ҳузуридаги АОКА директори Асаджон Хўжаев раҳбарлигида Ўзбекистон делегацияси иштирок этди.
«Gazeta.uz»нинг маълум қилишича, Асаджон Хўжаев маҳаллий ОАВларга берган интервьюсида Агдам шаҳридаги ҳолатга тўхталиб, «Бу ерда битта масжиддан ташқари деярли ҳамма нарса вайрон қилинган: уйлар, инфратузилма. Жаҳон ҳамжамияти бунга эътибор қаратиши керак», — деб айтган.
Агентлик директори Туркий кенгаш давлатлари Озарбайжонда олиб бориладиган қурилиш ишларида фаол иштирок этишини таъкидлаган. Шунингдек, у Ўзбекистон ушбу ҳудудларни ва инфратузилмани тиклашда ўз ёрдамини таклиф қилганини эслатган.
«Айни пайтда биз мутахассислар билан қайта тиклаш лозим бўлган объектлар рўйхатини белгилаб олмоқдамиз ва бизнинг қурувчиларимиз бунда қатнашишга келади. Менинг билишимча, битта мактабни қуриш тўғрисида келишув мавжуд бўлиб, у Озарбайжон халқига Ўзбекистондан туҳфа сифатида тақдим этилади. Яқин орада ҳамкорлигимиз натижаларини кўрамиз, деган умиддаман. Ва энг асосийси Тоғли Қорабоғ ҳудудига тинчлик келди», — деган Хўжаев.
Эслатиб ўтамиз, 2020 йилнинг сентябрь ойи охирида Тоғли Қорабоғда Озарбайжон ва Арманистон давлатлари ўртасида қуролли низо келиб чиққан эди. 2020 йилнинг 10 ноябрида ўт очишни тўхтатиш тўғрисидаги уч томонлама келишув имзоланиши билан низолар якунига етди. Унга кўра, Боку Тоғли Қорабоғ билан қўшни етти вилоят, шунингдек, Шуша ва Гадрут шаҳарлари устидан назоратни қайта тиклади. Ҳудуднинг қолган қисмига Россия тинчликпарварлари жойлаштирилди.
Аввалроқ Шавкат Мирзиёев Ўзбекистон Тоғли Қорабоғ заминидаги кўҳна обидалар, маданият ва маърифат масканларини тиклаш ишларига ҳисса қўшишга тайёр эканини билдирган эди.
Изоҳ (0)