O‘zbekistonda Red Bull saqichini ishlab chiqaruvchilar 2,4 million so‘m jarimaga tortildi. Bu haqda Intellektual mulk agentligi matbuot xizmati xabar berdi.
Ma’lum bo‘lishicha, “M.R.R.” (shartli nom) oilaviy korxona Red Bull GmbH (Аvstriya) kompaniyasiga tegishli bo‘lgan tovar belgisidan noqonuniy foydalanib, Red Bull Energy Cаndy tovar belgili qandolat mahsulotlarini ishlab chiqarish va sotish bilan shug‘ullanib kelgan.
Red Bull GmbH kompaniyasi tovar belgisiga bo‘lgan huquqlari buzishini to‘xtatishni so‘rab 2020-yilning 10 martidan “M.R.R.” oilaviy korxonasi rahbariga bir necha ogohlantiruv xati yuborgan, ammo korxona murojaatni e’tiborsiz qoldirgan.`
Shundan so‘ng Аvstriya kompaniyasi tovar belgisidan noqonuniy foydalanganlik uchun chora ko‘rish yuzasidan Intellektual mulk agentligiga murojaat qilgan. Agentlik vaziyatni o‘rganib chiqib, huquqbuzarga ma’muriy javobgarlik masalasini ko‘rib chiqishlik uchun bayonnoma tuzilib, jinoyat sudiga yuborgan.
Sud tovar belgisidan noqonuniy foydalangan “M.R.R.” oilaviy korxonasiga bazaviy hisoblash miqdorining 10 baravari (taxminan 2,4 million so‘m) miqdorida jarima jazosi belgilagan.
Ma’lumot uchun, Аvstriyaning Red Bull GmbH kompaniyasi O‘zbekistonda o‘zining mahsulotlarida qo‘llaniladigan tovar belgilarini Intellektual mulk agentligidan ro‘yxatdan o‘tkazib, huquqiy muhofaza olgan.
Izoh (0)