Buxoro shahridagi Alpomish ko‘chasining nomi 2016—2020-yillarda Buxoro viloyati hokimi bo‘lib ishlagan O‘ktam Barnoyev nomiga o‘zgartirildi. Xalq deputatlari Buxoro shahar Kengashining o‘ttiz sakkizinchi sessiyasida bu taklif deputatlar tomonidan bir ovozdan ma’qullandi, deya xabar qilmoqda “Xalq so‘zi online”.
“O‘ktam Isayevich yurtparvar, elparvar, fidoyi rahbar sifatida xalqimiz yodida qoldi. U Buxoroda juda ko‘plab xayrli ishlar tashabbuskori bo‘ldi. Men bu o‘rinda birgina misol bilan kifoyalanmoqchiman. Bilasiz, Mahmud Torobiy —yurt ozodligi yo‘lida jonini fido etgan buyuk ajdodimizdir. O‘ktam Isayevich uning xotirasini abadiylashtirish maqsadida Jondor tuman markazida Mahmud Torobiy nomidagi harbiy-vatanparvarlik bog‘ini barpo etish tashabbuskori bo‘ldi. Hozir bu go‘sha yoshlarni el-yurtga muhabbat ruhida tarbiyalashdek ulug‘ ishga kamarbasta maskanga aylangan”, — deydi mehnat faxriysi Safar Ahmedov.
Eslatib o‘tamiz, bosh vazir o‘rinbosari O‘ktam Barnoyev 2020-yil 20-sentabr kuni vafot etgandi. Ma’lumotlarga ko‘ra, Barnoyev Germaniyada vafot etgan — u xorijiy mamlakatga davolanish uchun olib ketilgan. Bosh vazir o‘rinbosarining koronavirusga chalingani iyul oyi oxirida ma’lum bo‘lgan edi. Prezident Barnoyevning oila a’zolariga ta’ziya bildirish paytida bu haqda gapirib, “Gapirmasam ham, meni tushunardi”, deya ta’riflagan edi. Samarqand shahridagi ko‘chalarning biriga O‘ktam Barnoyev nomi berilgan.
Shuningdek, Xalq deputatlari shahar Kengashining sessiyasida G‘ijduvon ko‘chasini Karim Kamolov nomi bilan atash to‘g‘risidagi taklif qo‘llab-quvvatlandi.
Buxoro viloyati hokimi vazifasini bajaruvchi Karim Kamolov 2020-yil 22-avgust kuni 65 yoshida vafot etgandi. Karim Kamolov koronavirusga chalinib, Toshkentda kasallikdan davolanayotgani haqida ilk bor 30-iyul kuni Sog‘liqni saqlash vazirligi huzuridagi Koronavirusga qarshi kurash shtabi a’zolari ma’lum qilgan edi.
Ma’lumot uchun, 2020-yilning fevralida Buxoro viloyati hokimi O‘ktam Barnoyev bosh vazir o‘rinbosari etib tayinlangani munosabati bilan Karim Kamolov viloyat hokimi vazifasini bajaruvchi etib tayinlangan edi. Ungacha Kamolov Buxoro shahari hokimi vazifasida ishlagan.
Izoh (0)