Birlashgan Arab Amirliklarining bosh vaziri Muhammad bin Rashid al-Maktum mamlakatning birinchi ayol kosmonavti Nura al-Matrushiy bo‘lishini ma’lum qildi. Bu haqda u o‘zining Twitter sahifasida xabar berdi, deb yozmoqda “RBK”.
“Ikki nafar yangi kosmonavtlarning biri ayol kishi ekanini ma’lum qilamiz. Nura al-Matrushiy va Muhammad al-Mullani tabriklayman”, — dedi bosh vazir o‘zining ijtimoiy tarmoqdagi blogida.
Uning ta’kidlashicha, nomzodlar 4000 dan ortiq da’vogarlar ichidan tanlab olingan, NASA’ning koinotni tadqiq qilish bo‘yicha dasturi doirasidagi ularning tayyorgarligi tez orada boshlanadi.
2020-yilning yozida BAA birinchi marta Marsga kosmik zond uchirdi. O‘shanda Yaponiyaning H-IIA tashuvchi raketasi BAAning “Al-Amal” (“Umid”) kosmik zondi bilan Tanegasima orolidagi (Yaponiya) kosmodromdan Marsga uchgan. Zond arab olimlari va muhandislari tomonidan ishlab chiqilgan bo‘lib, u Marsning yuqori atmosferasini o‘rganadi va sayyoradagi iqlim o‘zgarishlarini kuzatadi.
2019-yilda “Roskosmos” BAAning “Soyuz” kosmik kemasini va uning uchirish xizmatlarini sotib olish rejalari haqida xabar berdi. “BAAning istiqbolli parvozlar dasturida kosmik kema talab etiladigan maxsus tajriba missiyalarini tashkil etish rejalashtirilgan. Gap bizdan “Soyuz” kosmik kemasini sotib olish haqida ketmoqda”, — degan edi boshqariladigan kosmik dasturlar bo‘yicha davlat korporatsiyasining ijrochi direktori Sergey Krikalyev.
Avvalroq AQSh Aeronavtika va kosmik makonni tadqiq qilish bo‘yicha milliy boshqarmasi (NASA) yaqin o‘n yil ichida Oyga birinchi ayolni uchirishni rejalashtirayotgani ma’lum bo‘ldi. NASA kosmik parvozlari rahbari Charli Blekvell-Tompson CBS News telekanaliga ma’lum qilishicha, missiya “Artemida” dasturi doirasida rejalashtirilmoqda, ushbu dasturga to‘qqiz nafar erkak va to‘qqiz nafar ayol a’zo bo‘ladi.
Izoh (0)