KXDR hukumati masofaviy ta’lim dasturini amalga oshirish komissiyasi raisini ushbu organning samarasiz faoliyati sababli qatl etdi. Bu haqda Janubiy Koreyaning DailyNK nashri mamlakatdagi o‘z manbasiga tayanib, 10-aprel kuni xabar berdi.
Pxenyanning rasmiy versiyasiga ko‘ra, tuzilma 2020-yilda tashkil etilganidan buyon birorta natijaga erisha olmagan. Biroq Janubiy Koreya nashri qayd etishicha, masofaviy ta’lim dasturiga rahbarlik qilgan Pak familiyali mansabdor boshqa ba’zi xodimlar bilan birga hukumat siyosatini tanqid qilish bilan shug‘ullangan. U, go‘yoki, o‘z oldiga qo‘yilgan maqsadlarni amalga oshirish uchun talab etiluvchi uskunalar va binolar yetishmasligi haqida bir necha marta aytgan.
Xabarlarga ko‘ra, Pak bir necha marta vaziyatni o‘zgartirishni taklif qilgan, o‘z noroziligini bildirgan va komissiyaning boshqa ishchilaridan majlislarga rasmiy munosabatda bo‘lishni so‘ragan.
So‘ng komissiya a’zolaridan biri, Kim Ir Sen nomidagi universitetning yuridik fakulteti dekani OTM prezidenti va oliy ta’lim vaziri bilan uchrashgan va ular bilan masofaviy ta’limga aloqador vaziyatni muhokama qilgan.
Nashr ma’lumotlariga qaraganda, dekan bu sohada hamma narsa ham “maqsadga muvofiq amalga oshirilmayotgani”ni aytgan va Pak faoliyatidagi muayyan tafsilotlar haqida gapirib bergan, bu haqda partiya markaziy qo‘mitasidagilar xabar topgan. Tashkilot departamenti va markaziy qo‘mita tuzilmasidagi rahbariyat shundan keyin komissiyaga nisbatan surishtiruv boshlagan.
Mart oyining ikkinchi haftasida Pak “ta’lim sohasida partiyaga qarshi va inqilobga qarshi tariqatchilik faoliyatini olib borgani uchun” degan rasmiy sabab bilan qatl etilgan.
2020-yil noyabr oyida Shimoliy Koreyada kamida ikki nafar amaldor COVID-19 koronavirus pandemiyasi sabab yuzaga kelgan iqtisodiy tanglik tufayli qatl qilingani, dekabrda esa odamlarni qo‘rqitish va ularni COVID-19 sababli karantinga qat’iy amal qilishga majburlash maqsadida bir erkak “favqulodda karantin choralarini” buzganligi sababli omma oldida qatl etilgani xabar berilgan edi.
Izoh (0)