Innovatsion rivojlanish vazirligi buyurtmasiga ko‘ra, O‘zbekiston Fanlar akademiyasi Genomika va bioinformatika markazi olimlari koronavirusning to‘liq genomlarini birinchi marta O‘zbekistonda o‘qidi va bioinformatik tahlil ishlarini olib bordi, deb xabar bermoqda “Xalq so‘zi Online”.
Qayd etilishicha, natijalar koronavirus genom ma’lumotlari uchun ochiq ma’lumotlar tarmog‘i — GISAID ma’lumotlar bazasiga joylandi va tegishlicha rasmiylashtirildi. Shu munosabat bilan O‘zbekiston o‘z hududida koronavirusning barcha variantlari DNK ketma-ketligini to‘liq sekvenlagan 50 ta mamlakat qatoriga kirdi.
Genomika va bioinformatika markazi olimlari tomonidan Toshkent viloyati Sanitariya-epidemiologiya va jamoat sog‘lig‘i boshqarmasi hamda Biogen Med xususiy klinikasidagi birlamchi virus yuqtirgani tasdiqlangan fuqarolarning 62 nafaridan namunalar olingan va yangi avlod sekvenatori yordamida ularning 32 ta genomi to‘liq sekvenlash orqali tahlil qilingan yoki boshqacha qilib aytganda, DNK ketma-ketligi o‘qilgan.
Ta’kidlanishicha, SARS-CoV-2 virusining genom ma’lumotlari ilk bora 2020-yilning yanvar oyida Xitoyda aniqlangan. O‘sha paytdan boshlab butun dunyoda tarqalgan koronavirus namunalari olinib, genomlarini sekvenlash ishlari boshlandi. Genomlarni aniqlash mahalliy va global miqyosda epidemiologik tadqiqotlar o‘tkazish uchun zarur bo‘lib, virusning evolyutsion tahlilini amalga oshirish, uning qayerda paydo bo‘lgani, qanday mutatsiyalarga uchragani va boshqa ma’lumotlarni beradi.
“Bu ma’lumotlar yordamida esa vaksina yaratiladi. O‘zbekistonda tarqalgan koronavirus variantlari haqidagi ma’lumotlar aynan yurtimizda tarqalgan shtammlarga qarshi yo‘naltirilgan milliy vaksinamizni yaratish ishlari uchun o‘ta muhimdir”, — deyiladi xabarda.
Eslatib o‘tamiz, o‘zbekistonlik olimlar koronavirusga chalinganlar genidagi DNK ketma-ketligini aniqlashni 2020-yilning may oyida boshlagandi.
Izoh (0)