Toshkent shahri Yakkasaroy tumanida sigaretalarga giyohvand moddalar o‘rab olgan shaxs qo‘lga olindi, deya xabar qilmoqda Tergov departamenti.
Qayd etilishicha, 2021-yilning 29-mart kuni Yakkasaroy tumani bo‘yicha IIO FMB JQB xodimlari tomonidan tezkor tadbir o‘tkazilgan. Qushbegi mavzesida joylashgan “Dunyo” restorani oldida 23 yoshli B.A. to‘xtatilib, uning yoni xolislar ishtirokida ko‘zdan kechirilgan vaqtda 7 dona Parliament sigaretasiga qo‘lbola usulda o‘ralgan o‘ziga xos o‘tkir hidli moddalar borligi aniqlanib, ashyoviy dalil tariqasida rasmiylashtirib olingan.
Sud kimyoviy ekspertiza xulosasida B.A.dan olingan 7 dona sigaretada jami vazni 2,71 gramm nikotin va ADB-Butinaca giyohvandlik moddasi o‘ralgan holda ekanligi ko‘rsatilgan.
Mazkur holat yuzasidan Yakkasaroy tumani bo‘yicha IIO FMB huzuridagi tergov bo‘linmasi tomonidan Jinoyat kodeksining 276-moddasi 2-qismi “a” bandi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash va saqlash) bilan jinoyat ishi qo‘zg‘atilgan.
Hozirda tergov harakatlari olib borilmoqda.
Bundan avval Toshkentda qariyb 100 million so‘mlik kuchli ta’sir qiluvchi dori vositalarining noqonuniy aylanmasiga chek qo‘yilgani, Farg‘onada uyida giyohvand modda saqlab kelgan shaxsga nisbatan jinoyat ishi qo‘zg‘atilgani hamda Andijonda giyohvand moddalarni oyoq kiyimga yashirib o‘tmoqchi bo‘lganlar qo‘lga tushgani haqida xabar berilgandi.
Izoh (0)