Namanganlik erkak bilan Telegram’da yolg‘on ishqiy munosabatga kirishib, keyin ushbu yozishmalarni tarqatish bilan tahdid qilgan ayol qo‘lga olindi, deya xabar bermoqda Tergov departamenti.
Ma’lum qilinishicha, 27-yoshli H.Q. ariza bilan murojaat qilib, unda 2021-yil mart oyining boshlarida o‘zini Namangan davlat universiteti talabasi deb tanishtirgan Yu. ismli shaxs bilan Telegram messenjeri orqali yaqindan tanishgan va u bilan ishqiy munosabatlarga kirishishi haqida gaplashgan.
So‘ng X.Q.ga o‘zini O. deb tanishtirgan shaxs Yu. bilan o‘rtasidagi yozishmalarni internet tarmog‘iga chiqarib, oila a’zolariga ma’lum qilish bilan tahdid qiladi. U ushbu yozishmalarni tarqatmaslik evaziga H.Q.dan 1000 AQSh dollari berishni talab qiladi.
Ushbu pullarni Chortoq tumani Zargar ko‘chasida S.A. ismli fuqaro olayotgan vaqtida IIB xodimlari tomonidan ushlangan.
Olib borilgan tergovga qadar tekshiruv harakatlari davomida H.Q.dan 1000 dollar olgan S.A. ismli fuqaro Yu. ismli shaxsning yaqin dugonasi ekanligi, uning iltimosiga binoan ushbu pullarni olganligi ma’lum bo‘lib, 21 yoshli Yu.A. tovlamachilik yo‘li bilan qo‘lga kiritilgan 1000 AQSh dollari pullarni S.A.dan olgan vaqtida ushlanib, O. va Yu. ismli shaxslar ham uning o‘zi ekanligi aniqlangan.
Mazkur holat yuzasidan Namangan shahri bo‘yicha IIO FMB huzuridagi tergov bo‘limi tomonidan Yu.A.ga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, gumon qilinuvchi tariqasida jalb qilingan.
Avvalroq bekobodlik ayolning eski Telegram akkauntidagi shaxsiy rasmlarini internetda tarqatib yubormaslik uchun undan 5 million so‘m so‘ragan 15 yoshli qiz ushlangani, Xorazmda ayolning shaxsiy videotasvirlarni qarindoshlariga ko‘rsatish bilan qo‘rqitib, undan 1,5 ming dollar va telefon talab qilgan yigit qo‘lga olingani hamda Toshkentda qizi va yigit o‘rtasidagi munosabatlarni sir saqlash uchun yigitning otasidan pul talab qilgan ayolga jinoyat ishi qo‘zg‘atilgani haqida xabar berilgandi.
Izoh (0)