Davlat soliq qo‘mitasi raisi buyrug‘i bilan Toshkent viloyatining Yangiyo‘l shahri va Bo‘ka tumaniga hamda Buxoro viloyatining Shofirkon tumaniga yangi davlat soliq inspeksiyasi boshliqlari tayinlandi. Bu haqda DSQ matbuot xizmati xabar berdi.
Buxoro viloyati Shofirkon tumani davlat soliq inspeksiyasi boshlig‘i lavozimiga Alpomish Xolmurodov tayinlandi. Tayinlovga qadar u Shofirkon tumani davlat soliq inspeksiyasi boshlig‘ining birinchi o‘rinbosari vazifasida ishlab kelgan.
U 1985-yilda Buxoro viloyatida tug‘ilgan. 2006-yilda Toshkent moliya institutini soliq va soliqqa tortish mutaxassisligi bo‘yicha tamomlagan. Soliq organlaridagi faoliyatini 2006-yilda Buxoro viloyati Shofirkon tumani davlat soliq inspeksiyasi Yuridik shaxslarni soliqqa tortish bo‘limi inspektori lavozimidan boshlagan.
Yangiyo‘l shahar davlat soliq inspeksiyasi boshlig‘i etib Ravshan Boboyev tayinlandi. Tayinlovga qadar u Yangiyo‘l shahar davlat soliq inspeksiyasi boshlig‘i vazifasini bajaruvchi sifatida ishlab kelgan.
U 1981-yilda Toshkent viloyatida tug‘ilgan. 2006-yilda Soliq akademiyasini soliq va soliqqa tortish mutaxassisligi bo‘yicha tamomlagan. Ravshan Boboyev soliq organlaridagi faoliyatini 2002-yilda Toshkent viloyati Zangiota tumani davlat soliq inspeksiyasi Qisqa muddatli tekshirishlar o‘tkazish sho‘basi inspektori lavozimidan boshlagan.
Bo‘ka tumani davlat soliq inspeksiyasi boshlig‘i lavozimiga Alisher Qodirov tayinlandi. Tayinlovga qadar u Toshkent viloyati Bo‘ka tumani davlat soliq inspeksiyasi boshlig‘i vazifasini bajaruvchi sifatida ishlab kelgan.
U 1970-yilda Toshkent viloyatida tug‘ilgan. 1995-yilda Toshkent davlat universitetini, 2001-yilda Toshkent moliya institutini soliq va soliqqa tortish mutaxassisligi bo‘yicha tamomlagan. Soliq organlaridagi faoliyatini 1995-yilda Sirdaryo viloyati Guliston shahar davlat soliq inspeksiyasi Tahlil va tushumlarni nazorat qilish bo‘limi inspektori lavozimidan boshlagan.
Ularning barchasi soliq xizmatining III darajali maslahatchisi hisoblanadi.
Izoh (0)