Yilning birinchi choragida oltin narxi, taxminan, 10 foizga arzonlab, ushbu davr uchun 1982-yildan buyon rekord pasayish bo‘ldi, deb yozmoqda Spot Bloomberg’ga tayanib.
Qayd etilishicha, 2020-yil avgustidan buyon oltin 19 foizga arzonladi va pandemiyadan oldingi narxiga tenglashdi.
Oltin himoya aktivi hisoblanadi — inqiroz davrida ko‘tariladi, vaziyat yaxshiligida esa aksincha, uning narxi pasayadi. Pandemiya davom etayotgan bo‘lsa-da, vaksinalar ishlab chiqarish bo‘yicha natijalar yaqin orada koronavirusning iqisodiyotga ta’siri yo‘qolishiga umid bermoqda.
Oltin narxiga, shuningdek, boshqa bir qator omillar, masalan, AQSh g‘aznachilik obligatsiyalari bilan bog‘liq vaziyat (ushbu chorak ular uchun bir necha o‘n yildan buyon eng yomoni bo‘ldi) va kriptovalyutalar bilan raqobat ta’sir o‘tkazadi.
Oltin va O‘zbekiston
2020-yilda O‘zbekistonda xorijga 100 tonna nomonetar oltin sotgan. Bu tonnalarda amalga oshirilayotgan sotuvlarga oid ma’lumotlarning so‘nggi 10 yil ichida birinchi marotaba e’lon qilinishi. Davlat statistika qo‘mitasi oltinga oid statistikani muntazam e’lon qilib keladi, biroq u miqdor emas, balki pul ko‘rinishida.
O‘zbekiston Markaziy banki hisobotidan ma’lum bo‘lishicha, eng kam oltin sotilgan davr 2012-yil (10 tonna) bo‘lib, eng ko‘p sotilgan yil 2019-yil (110 tonna) bo‘ldi. Ushbu davrlardagi o‘rtacha narxlar ham turlicha bo‘lgan, masalan, 2012-yilda oltinning bir unsiyasi narxi 1668,9 dollar bo‘lgan. 2015-yilda esa 1159,8 dollargacha tushgan. 2020-yilda 1771 dollarga o‘sdi.
O‘zbekiston so‘nggi marta 2020-yil avgustida oltin eksport qildi. Markaziy bank oltinni valyuta aktivlarini samarali boshqarish, shu jumladan, xalqaro qimmatbaho metallar bozori tahlili va oltin narxlari prognozi asosida sotadi.
Markaziy bank oltin narxi qimmat bo‘lgan (2 ming dollargacha ko‘tarilgan) paytda faol ravishda sotgan. Sentabr oyida, eksport to‘xtagan paytda oltin narxi 1904 dollarga tushdi. Hozirda esa uning narxi 1724 dollargacha arzonladi.
Izoh (0)