Yonayotgan “Gazel”ni ichkaridan haydab chiqqan rahbar: Qibraydagi bir murda chiqqan yong‘inning qo‘shimcha tafsilotlari ma’lum qilindi

Toshkent viloyatining Qibray tumani Do‘stlik ko‘chasida joylashgan Progress Roman kompaniyasiga tegishli ishlab chiqarish hududida 3-fevralga o‘tar kechasi yong‘in yuz bergani, olovni o‘chirish vaqtida ushbu ishlab chiqarish hududida ishlagan 42 yoshli erkak (D.M.)ning murdasi topilgani haqida xabar berilgan edi. Bosh prokuratura matbuot xizmati ushbu hodisa yuzasidan olib borilgan tekshiruv yakunlari bo‘yicha “Daryo”ga qo‘shimcha ma’lumot taqdim etdi.

Ma’lum bo‘lishicha, o‘t ketgan ishlab chiqarish hududi rahbariga qo‘shni korxonaning qorovuli qo‘ng‘iroq qilib, yong‘in haqida xabar bergan. Voqea joyiga zudlik bilan yetib kelgan boshliq mahsulotlar, ichkarida bo‘lgan “Gazel” yuk mashinasi yonayotganini ko‘rgan.

“Tezda yonayotgan mashinani tashqariga haydab olib chiqdim. ‘Ichkarida kim bor?’, deb baqirganimda hech kim javob bermadi. Keyin D.M.ning turmush o‘rtog‘iga qo‘ng‘iroq qilib, eri qayerdaligini so‘radim, u D.M.ning ishda ekanini, uyga kelmaganini aytdi. Unga D.M. uyga kelsa, zudlik bilan menga qo‘ng‘iroq qilishini tayinladim. Shundan so‘ng D.M.ni korxona ichidan qidira boshladik”, — dedi korxona rahbari.

Ta’kidlanishicha, D.M. yong‘in chiqqan korxonada 2017-yilda bir muddat ishlab, so‘ng ishdan bo‘shagan va ma’lum vaqt ishsiz yurgan. U 2020-yilning avgust oyida yana ish so‘rab kelib, texnik uskuna bilan ishlash va korxonani qo‘riqlash vazifasida ishlab kelgan.

Bosh prokuratura matbuot xizmatining qayd etishicha, ushbu holat bo‘yicha Qibray tuman prokuraturasi tomonidan Jinoyat-protsessual kodeksining 83-moddasi 2-bandiga (gumon qilinuvchining qilmishida jinoyat tarkibi bo‘lmagani uchun aybsiz deb topish va reabilitatsiya etish) asosan jinoyat ishi qo‘zg‘atishni rad etish haqida qaror qabul qilingan.