Тошкент вилоятининг Қибрай тумани Дўстлик кўчасида жойлашган Progress Roman компаниясига тегишли ишлаб чиқариш ҳудудида 3 февралга ўтар кечаси ёнғин юз бергани, оловни ўчириш вақтида ушбу ишлаб чиқариш ҳудудида ишлаган 42 ёшли эркак (Д.М.)нинг мурдаси топилгани ҳақида хабар берилган эди. Бош прокуратура матбуот хизмати ушбу ҳодиса юзасидан олиб борилган текширув якунлари бўйича «Дарё»га қўшимча маълумот тақдим этди.
Маълум бўлишича, ўт кетган ишлаб чиқариш ҳудуди раҳбарига қўшни корхонанинг қоровули қўнғироқ қилиб, ёнғин ҳақида хабар берган. Воқеа жойига зудлик билан етиб келган бошлиқ маҳсулотлар, ичкарида бўлган «Газель» юк машинаси ёнаётганини кўрган.
«Тезда ёнаётган машинани ташқарига ҳайдаб олиб чиқдим. ‘Ичкарида ким бор?’, деб бақирганимда ҳеч ким жавоб бермади. Кейин Д.М.нинг турмуш ўртоғига қўнғироқ қилиб, эри қаердалигини сўрадим, у Д.М.нинг ишда эканини, уйга келмаганини айтди. Унга Д.М. уйга келса, зудлик билан менга қўнғироқ қилишини тайинладим. Шундан сўнг Д.М.ни корхона ичидан қидира бошладик», — деди корхона раҳбари.Кўп ўтмай ўт ўчирувчилар корхонадаги сув сақлаш идиши ичида мурда — Д.М.нинг жасади борлигини аниқлаган. Суд-тиббий экспертиза хулосасига кўра, у сувга чўкиб, нафас йўлларининг суюқлик билан беркилишидан келиб чиққан механик асфиксия оқибатида вафот этган. Мурданинг пешона, бурун, елка ва панжаларида куйиш жароҳатлари ҳам аниқланган.
Таъкидланишича, Д.М. ёнғин чиққан корхонада 2017 йилда бир муддат ишлаб, сўнг ишдан бўшаган ва маълум вақт ишсиз юрган. У 2020 йилнинг август ойида яна иш сўраб келиб, техник ускуна билан ишлаш ва корхонани қўриқлаш вазифасида ишлаб келган.
Бош прокуратура матбуот хизматининг қайд этишича, ушбу ҳолат бўйича Қибрай туман прокуратураси томонидан Жиноят-процессуал кодексининг 83-моддаси 2-бандига (гумон қилинувчининг қилмишида жиноят таркиби бўлмагани учун айбсиз деб топиш ва реабилитация этиш) асосан жиноят иши қўзғатишни рад этиш ҳақида қарор қабул қилинган.
Изоҳ (0)