Dunyoning turli burchaklarida 30-mart kuni olingan fotosuratlar to‘plamini taqdim etamiz.

Shavkat Mirziyoyev O‘zbekistonda rasmiy tashrif bilan bo‘lib turgan Vengriya bosh vaziri Viktor Orbanga venger yozuvchisi Yanosh Aronning o‘zbek tiliga tarjima qilingan “Ajoyib ohuning hikoyati” asarini sovg‘a qildi. Ushbu asar so‘zboshisini Shavkat Mirziyoyevning o‘zi yozgan.

Foto: “Daryo” / Madina Nurman

Buyuk Britaniyada bolalar Elephant Family xalqaro xayriya tashkiloti tomonidan yaratilgan va Glostershirdagi Sudeley Castle maydonida namoyish etilgan, real o‘lchamdagi yog‘och fillar atrofida o‘ynamoqda. 30 dan ortiq qo‘lda ishlangan yog‘och fillar olti hafta davomida ushbu maydonda bo‘lib, may oyining oxirida Londondagi Qirollik bog‘lariga jo‘natiladi.

Foto: PA

Jakartadagi Seaworld okeanariumida quyon kostyumlarini kiygan g‘avvoslar Pasxa bayramini nishonlash va odamlarni atrof-muhitni muhofaza qilishga chorlab chiqish qildi.

Foto: Getty Images

Vashingtondagi Vyetnam urushi faxriylari yodgorligida AQSh prezidenti Jo Bayden va birinchi xonim Jil Baydenning aksi.

Foto: Shutterstock

Myanmadagi qishloq aholisi mamlakatning sharqiy qismida joylashgan Karen shtatidagi o‘rmonda hokimiyatni qo‘lga olgan harbiylarning havo hujumidan himoyalanmoqda. Myanma harbiylari Qurolli Kuchlar kunini nishonlagan 27-mart kuni turli shaharlar aholisi harbiy diktaturaga qarshi norozilik bildirib, ko‘chalarga chiqqan. Harbiylar mamlakatning 40 dan ortiq shaharlarida namoyishchilarga qarshi qurol qo‘llagan. O‘sha kungi ma’lumotlarga ko‘ra, harbiylar tomonidan 114 kishi o‘ldirilgan.

Foto: Getty Images

Yaqinda Somersbi shahriga olib kelingan 10 ta alligatordan biri Avstraliya reptiliya bog‘iga qo‘yib yuborildi. Shu bilan bog‘dagi amerika alligatorlari soni 55 taga yetdi. Bu Avstraliyadagi alligatorlarning eng katta populatsiyasi hisoblanadi.

Foto: Avstraliya reptiliya bog‘i

Shveysariya politsiyasi Mormont karyerini kengaytirishga to‘sqinlik qilmoqchi bo‘lgan namoyishchilarni tarqatish bo‘yicha operatsiya boshlaganda, namoyishchilardan biri pirotexnika vositasidan foydalandi.

Foto: EPA

Pekindagi moda namoyishi vaqtida podiumdagi bolalar.

Foto: Shutterstock

Vashingtonga kelgan sayyoh National Mall bog‘idagi gullarga ishora qilmoqda. Oq uy, Vashington monumenti, Linkoln yodgorligi hamda boshqa ko‘plab mashhur binolar joylashgan ushbu bog‘ga har yili o‘rtacha 25 million sayyoh tashrif buyuradi.

Foto: Reuters

Surxondaryo viloyati Termiz temiryo‘l vokzalida muddatli harbiy xizmatning belginlangan muddatini o‘tab bo‘lgan askarlarni kutib olish tadbiri bo‘lib o‘tdi.

Foto: Mudofaa vazirligi

El-Paso shahriga Gondurasdan kelgan muhojir ona va uning o‘g‘li Texasdagi AQSh chegara xizmati agentligidan boshpana so‘rash uchun piyoda ketmoqda. Qo‘shma Shtatlarda migratsiya muammosi tobora og‘irlashmoqda. Fevral oyida Meksika bilan chegarada 2019-yil iyunidan buyon rekord ko‘rsatkichda — qariyb 100 ming kishi qo‘lga olingan. AQSh prezidenti Jo Bayden tomonidan Tramp kiritgan noqonuniy immigratsiyaga qarshi choralarning bekor qilinishi migratsiya oqimining keskin o‘sishiga turtki bo‘ldi.

Foto: Reuters

Bangkokdagi hukumat uyi yonida hibsga olingan namoyish rahbarlarini ozod qilish va Jinoyat kodeksining 112-moddasini (qirol, malika yoki valiahdni obro‘sizlantirish, haqorat qilish yoki ularga tahdid qilish) bekor qilishni talab qilgan namoyishchilar politsiya oldida 3 ta barmog‘ini ko‘rsatib, yotib oldi.

Foto: Reuters

Keniyaning Nayrobi shahrida COVID-19 bilan kasallanish holatlari ko‘payishi va tarqalishiga qarshi kurash choralari doirasida joriy qilingan komendantlik soati — soat 20:00 gacha o‘z uyi yaqinida meva va sabzavot sotayotgan bola.

Foto: Getty Images

AQSh Milliy talabalar yengil atletika assotsiatsiyasining Elite Eight turnirida Arkansas Razorbacks jamoasiga qarshi o‘ynayotgan Baylor Bears hujumchisi Jonatan Chamua Chatchua birinchi bo‘limda to‘pni savatga tushirmoqda.

Foto: Reuters

Falastinlik namoyishchi Isroil tomonidan bosib olingan G‘arbiy sohilning Nablus yaqinidagi Sebastiya shahrida Yer kuni namoyishi paytida Isroil chegarachisi bilan janjallashmoqda.

Foto: Reuters

Nihang Sikx jangchisi Nyu-Dehli yaqinidagi Singhu chegarasida fermerlik to‘g‘risidagi qonunlarga qarshi norozilik namoyishi bo‘lgan joyda jang san’atining an’anaviy shakli bo‘lgan gathani ijro etmoqda.

Foto: Reuters

Suvaysh kanalini dunyodagi eng katta konteyner tashuvchi kemalaridan biri bo‘lgan Ever Given sayozlikdan chiqarilgan vaqtda misrlik erkak mamlakat bayrog‘ini silkitmoqda. 29-mart kuni Suvaysh kanalini to‘sib qo‘ygan Ever Given kemasi sayozlikdan chiqarildi. Kemani sayozlikdan chiqarish uchun 27 ming metr kub qum qazib olindi. Kemalar yo‘lining to‘sib qo‘yilishi jahon savdosiga soatiga 400 million dollarga tushayotgan edi. Ever Given jami 6 kun Suvaysh kanalini to‘sib turdi. Kanalda kemalar harakati 1-aprel kuni tiklanishi ma’lum qilingan.

Foto: Reuters

Ispaniyaning Gran Kanariya oroli janubidagi Arginegin portida muhojir go‘dak Ispaniya qirg‘oq xavfsizligi kemasiga olib o‘tilmoqda.

Foto: Reuters

Irlandiyaning Navan shahrida ochilgan birinchi yovvoyi tabiat kasalxonasidagi oqqush.

Foto: “TASS”

Ispaniyaning Jirona viloyatida yana ikki metrli metall monolit paydo bo‘ldi. Eslatib o‘tamiz, 18-noyabr kuni AQShning Yuta shtatida hamda 26-noyabr kuni Ruminiya shimolida tashqi ko‘rinishi bilan Stenli Kubrikning “Fazoviy sayohatnoma” filmidagiga o‘xshash uchburchak monolitlar topilgani, keyinroq ular joyidan yo‘qolib qolgani to‘g‘risida xabar berilgandi. Shuningdek, 4-dekabr kuni Kaliforniyada ham yangi monolit topilgan — uni ham kim o‘rnatgani noma’lum. Keyinroq bunday monolit Buyuk Britaniyada ham topildi.

Foto: EPA

Navoiy shahri uzra suzayotgan bulutlarning shahar markazidagi Alisher Navoiy nomli xiyobonning ko‘lidagi aksi. So‘nggi kunlarda Navoiy viloyatida kuzatilgan kuchli yog‘ingarchiliklar oqibatida viloyatning ayrim tumanlarida toshqinlar va sellar kuzatildi. Xususan, Xatirchiga bir kecha-kunduzda 1 gektar maydonga 540 tonna suv tushgani ma’lum qilindi.

Foto: Navoiy viloyati hokimligi

Bangkokda o‘qituvchi Kapitan Amerika kiyimida. Bangkokdagi maktab o‘qituvchilari vaqti-vaqti bilan mashg‘ulotlar, suhbatlar va imtihonlarda noodatiy atmosfera yaratish, shuningdek, o‘quvchilarni darsga ko‘proq jalb qilish uchun anime va komiks qahramonlari kostyumlarini kiyadi.

Foto: EPA