Navoiy viloyatida kuzatilgan sel oqibatida jabrlanganlar va halok bo‘lgan fuqarolar yo‘qligi ma’lum qilindi
O‘zbekistonning markaziy hududlarida 28-mart kuni kunning birinchi yarmida kuchli yog‘ingarchilik kuzatilgani haqida xabar berilgan edi. Xususan, Navoiy viloyatining Nurota tumanida sel kelishi, viloyatning boshqa — Xatirchi va Karmana tumanlarida suv to‘planishi, toshqin holatlari qayd etilgandi. Navoiy viloyati hokimligi hamda viloyat favqulodda vaziyatlar boshqarmasi yuqorida ko‘rsatilgan hududlarda fuqarolarga va binolarga hech qanday salbiy ta’sir ko‘rsatilmaganini ma’lum qildi.
Qayd etilishicha, shu kuni soat 09:20 dan 09:35 qadar kuzatilgan yog‘ingarchilik oqibatida viloyatning Navoiy shahri Karmana va Xatirchi tumani hududidagi ayrim yo‘l va aholi tomorqalariga suv to‘plangan. Jumladan, Karmana tumanida 21 ta hovli tomorqalariga, Xatirchi tumanida 15 hovli tomorqalariga suv kirishi hamda Navoiy shahri markaziy dehqon bozori hududida suv to‘planishi kuzatilgan.
Aholi hovlilari va ko‘chalarda to‘plangan suvlarni bartaraf etish, ariq va zovurlarga yo‘naltirish hamda aholiga tushuntirish ishlarini olib borish maqsadida viloyat favqulodda vaziyatlar boshqarmasi va uning hududiy bo‘linmalaridan 14 ta texnika va 72 nafar shaxsiy tarkib, shundan 10 ta yong‘in o‘chirish avtomobili, 4 ta maxsus texnika va 11 ta motopompa jalb etilgan.
Bundan tashqari, shahar-tuman hokimliklarining favqulodda vaziyat davlat tizimi navbatchilik qismlari bilan muntazam axborot almashinuvi amalga oshirishi ta’minlanib, vaziyat nazoratga olingani ta’kidlangan.
Ma’lum qilinishicha, viloyatning Xatirchi tumani hududidagi Uchqarosoy, Tasmachisoy, Oltinsoy, Maydonsoy, Mirshodsoy, Polvontasoy, Bog‘chikalonsoy, Po‘latchi I, Po‘latchi II, Achchiqsag‘anaqsoy, Javsansoy soylarida sel suvlari oqib o‘tmoqda. Ushbu soylardan kelayotgan suvlar aholi va hududlarga hech qanday talafot yetkazmagan.
“Yuzaga kelgan vaziyatlar oqibatida jabrlanganlar va halok bo‘lgan fuqarolar yo‘q. Holat yuzasidan qo‘shimcha ma’lumotlar berib boriladi”, — deyiladi e’lon qilingan rasmiy bayonotda.
Eslatib o‘tamiz, “O‘gidromet” 29-mart kuni ham yomg‘ir yog‘ishi, ba’zi joylarda kuchli bo‘lishini ma’lum qilgan.
