Qashqadaryo viloyat davlat soliq boshqarmasi viloyatdagi “Gissarneftgaz” qo‘shma korxonasidan 165 million so‘m o‘rniga 40 milliard 465 million so‘m soliq undirilganiga izoh berdi.
Ta’kidlanishicha, viloyat davlat soliq boshqarmasi mas’ul xodimlari tomonidan “Gissarneftgaz” qo‘shma korxonasida 2018—2019-yillardagi soliq to‘lovlari bo‘yicha eski tahrirdagi Soliq kodeksiga asosan, kameral nazorat tadbiri o‘tkazilgan.
“Kameral nazorat tadbiri soliq to‘lovchi tomonidan taqdim etilgan moliyaviy va soliq hisoboti, shuningdek, tashqi manbalardan olingan boshqa hujjatlarni o‘rganish hamda tahlil etish asosida amalga oshirilishi belgilangan. Bunda soliq to‘lovchiga aniqlangan soliqqa oid huquqbuzarliklarni mustaqil ravishda bartaraf etish huquqi berilishi qayd etilgan. Tegishli kamchiliklar bo‘yicha soliq to‘lovchiga talabnoma yuborilishi ma’lum. Talabnomaga javoban taqdim etilgan axborotning ishonchliligini tasdiqlash yoki axborotni o‘rganish zarurligi sezilsa, mavzuli ekspress o‘rganish tashkil etilishi belgilangan. Shunga ko‘ra, boshqarma boshlig‘ining 2019-yil 17-iyundagi buyrug‘iga asosan, ekspress o‘rganish o‘tkazilgan”, — deydi boshqarma axborot xizmati rahbari Firdavsiy Jabborov.
Aytilishicha, ekspress o‘rganish natijasi bo‘yicha 2019-yilning 21-iyunida tuzilgan ma’lumotnomada 2018-yil uchun mol-mulk solig‘idan 28 milliard 981 million 326 ming 100 so‘m, 2019-yil uchun 11 milliard 483 million 945 ming 600 so‘m qo‘shimcha hisoblangan va qayta hisobot taqdim etilishi bildirilgan. Lekin korxona mutasaddilari hisoblangan summalarga nisbatan e’tirozi borligini bildirib, qayta hisobot topshirmagan.
“Shu sababli ushbu qarzdorlikni undirish yuzasidan sudga da’vo arizasi kiritilgan. Viloyat iqtisodiy sudi kassatsiya instantsiyasining 2020-yil 4-iyundagi qarori bilan soliq idorasi foydasiga hal etilib, budjetga undirilgan. Ushbu jarayonlarda soliq organlarining harakatlari to‘liq qonun hujjatlariga asosan amalga oshirilgan”, — deydi boshqarma axborot xizmati mas’uli.
Ma’lumot berilishicha, ushbu nizo Oliy sudning 2021-yil 26-fevraldagi qarori bilan soliq to‘lovchi foydasiga hal etilgan. Va biznes ombudsman ma’lumot berganidek, qo‘shma korxonadan undirilgan salkam 41 milliard so‘m qaytarilib, soliq to‘lovi 165 million so‘m ekanligi ma’lum qilingan.
Qashqadaryo viloyat soliq boshqarmasi o‘z munosabatida Oliy sudning mazkur qarori yakuniy emasligini, kassatsiya instantsiyasi sudining ajrimi ustidan shikoyat qilish va uning qarori Oliy sud raisi yoki uning o‘rinbosari tomonidan bekor qilinishi mumkinligini eslatib, qaror ustidan shikoyat bildirishini ta’kidlagan.
Izoh (0)