Қашқадарё вилоят давлат солиқ бошқармаси вилоятдаги «Гиссарнефтгаз» қўшма корхонасидан 165 миллион сўм ўрнига 40 миллиард 465 миллион сўм солиқ ундирилганига изоҳ берди.
Таъкидланишича, вилоят давлат солиқ бошқармаси масъул ходимлари томонидан «Гиссарнефтгаз» қўшма корхонасида 2018—2019 йиллардаги солиқ тўловлари бўйича эски таҳрирдаги Солиқ кодексига асосан, камерал назорат тадбири ўтказилган.
«Камерал назорат тадбири солиқ тўловчи томонидан тақдим этилган молиявий ва солиқ ҳисоботи, шунингдек, ташқи манбалардан олинган бошқа ҳужжатларни ўрганиш ҳамда таҳлил этиш асосида амалга оширилиши белгиланган. Бунда солиқ тўловчига аниқланган солиққа оид ҳуқуқбузарликларни мустақил равишда бартараф этиш ҳуқуқи берилиши қайд этилган. Тегишли камчиликлар бўйича солиқ тўловчига талабнома юборилиши маълум. Талабномага жавобан тақдим этилган ахборотнинг ишончлилигини тасдиқлаш ёки ахборотни ўрганиш зарурлиги сезилса, мавзули экспресс ўрганиш ташкил этилиши белгиланган. Шунга кўра, бошқарма бошлиғининг 2019 йил 17 июндаги буйруғига асосан, экспресс ўрганиш ўтказилган», — дейди бошқарма ахборот хизмати раҳбари Фирдавсий Жабборов.
Айтилишича, экспресс ўрганиш натижаси бўйича 2019 йилнинг 21 июнида тузилган маълумотномада 2018 йил учун мол-мулк солиғидан 28 миллиард 981 миллион 326 минг 100 сўм, 2019 йил учун 11 миллиард 483 миллион 945 минг 600 сўм қўшимча ҳисобланган ва қайта ҳисобот тақдим этилиши билдирилган. Лекин корхона мутасаддилари ҳисобланган суммаларга нисбатан эътирози борлигини билдириб, қайта ҳисобот топширмаган.
«Шу сабабли ушбу қарздорликни ундириш юзасидан судга даъво аризаси киритилган. Вилоят иқтисодий суди кассация инстанциясининг 2020 йил 4 июндаги қарори билан солиқ идораси фойдасига ҳал этилиб, бюджетга ундирилган. Ушбу жараёнларда солиқ органларининг ҳаракатлари тўлиқ қонун ҳужжатларига асосан амалга оширилган», — дейди бошқарма ахборот хизмати масъули.
Маълумот берилишича, ушбу низо Олий суднинг 2021 йил 26 февралдаги қарори билан солиқ тўловчи фойдасига ҳал этилган. Ва бизнес омбудсман маълумот берганидек, қўшма корхонадан ундирилган салкам 41 миллиард сўм қайтарилиб, солиқ тўлови 165 миллион сўм эканлиги маълум қилинган.
Қашқадарё вилоят солиқ бошқармаси ўз муносабатида Олий суднинг мазкур қарори якуний эмаслигини, кассация инстанцияси судининг ажрими устидан шикоят қилиш ва унинг қарори Олий суд раиси ёки унинг ўринбосари томонидан бекор қилиниши мумкинлигини эслатиб, қарор устидан шикоят билдиришини таъкидлаган.
Изоҳ (0)