Nurmat Otabekov istalgan vaksina bilan jon deb emlanishini, deputat Kusherbayev esa o‘zbek-xitoy vaksinasini tanlaganini ma’lum qildi

Sanitariya-epidemiologik osoyishtalik va jamoat salomatligi xizmati rahbari o‘rinbosari Nurmat Otabekov “qanaqa vaksina bo‘lsa ham jon deb emlanishini” aytdi. Bu haqda u Toshkent xalqaro aeroportiga Xitoydan keltirilgan Xitoy—O‘zbekiston ZF-UZ-VAC2001 vaksinasini qabul qilib olish jarayonida ishtirok etgan vaqtida “Xalq so‘zi online”ga ma’lum qilgan.

Shuningdek, koronavirusga avval chalingan-chalinmaganidan qat’i nazar hamma emlanishini aytib o‘tgan.

Oliy Majlis Qonunchilik palatasi deputati Rasul Kusherbayev Xitoy va O‘zbekiston olimlari hamkorligida yaratilgan ZF-UZ-VAC2001 vaksinasi bilan emlanishga qaror qilganini bildirgan. “O‘rganish va klinik sinov natijalaridan kelib chiqib, men ham Xitoy va O‘zbekiston olimlari hamkorligida yaratilgan ZF-UZ-VAC2001 vaksinasi bilan emlanaman, degan qarorga keldim”, — degan u.

Eslatib o‘tamiz, Xitoy kompaniyasi mazkur vaksinani hamkorlikda ishlab chiqarish uchun O‘zbekistonda faoliyat yuritayotgan bir qator farmatsevtika korxonalari faoliyatini o‘rganib, laboratoriya hamda texnik va ishlab chiqarish quvvatlarini inobatga olib, Jurabek Laboratories MChJ qo‘shma korxonasini tanlagan. Ushbu vaksina 1-mart kuni davlat ro‘yxatidan o‘tkazilgan.

1 million dozadagi Xitoy—O‘zbekiston ZF-UZ-VAC2001 vaksinasi Xitoydan Toshkent xalqaro aeroportiga 27-mart kuni olib kelindi.  “Xalq so‘zi”ning yozishicha, vaksinaning O‘zbekistonga olib kelinishi va sinovlarida bosh-qosh bo‘lgan innovatsion rivojlanish vaziri Ibrohim Abdurahmonov ushbu vaksinaning narxi hali aniq emasligini aytgan.

“Narxlari hali aniq emas. Sababi uning narxlari ochiqlanmagan, hozircha. Biz bu vaksinaning ishlab chiqarilishidagi ma’lum qiymatini to‘lab berdik. O‘zbekiston aholisiga tekin bo‘ladi”, — degan u.

Ma’lumot uchun, ZF-UZ-VAC2001 Xitoy Fanlar akademiyasi Mikrobiologiya instituti olimlari tomonidan yaratilgan, Anhui Zhifei Longcom Biopharmaceutical Co.Ltd farmatsevtika kompaniyasi tomonidan ishlab chiqilgan va o‘zbekistonlik olimlar bilan hamkorlikda klinik tadqiqotlari olib borilgan koronavirusga qarshi yangi rekombinant vaksinadir. Uni yaratishda koronavirus tashqi oqsili biotexnologik usul bilan sintezlanib olingan bo‘lib, organizmga yuborilganda oqsilga nisbatan immun javob hosil bo‘ladi. Bunday vaksinalar boshqa turdagi vaksinalar bilan solishtirganda eng yuqori xavfsizlik profiliga ega hisoblanadi.