Qashqadaryo viloyatining Chiroqchi tumanida yashovchi fuqaro bilyardxonada qo‘shnisi bilan tortishib qolib, uni pichoqlab o‘ldirdi. Bu haqda “Daryo”ga viloyat IIB axborot xizmati ma’lum qildi.
Ta’kidlanishicha, mazkur jinoyat 2021-yilning 15-mart kuni kechki payt soat 20:00 da sodir bo‘lgan.
Tumanning “Paxtaobod” mahallasida sodir etilgan qotillik jinoyati viloyat IIB boshlig‘i Shuhrat Sotvoldiyev ishtirokida muhokama qilingan.
“2021-yilning 15-mart kuni soat 20:00 da Paxtaobod qishlog‘ida joylashgan bilyardxonada bilyard o‘ynayotgan marhum I. shu qishloqda yashovchi J. bilan navbat talashib janjallashib qolgan. Ikkovlon bir-birini haqorat qilgach, J. uyiga ketgan. Yo‘l-yo‘lakay achchiq ustida raqibining haqoratlarini tahlil qilib, oshxona pichog‘ini olgan va yana bilyardxonaga qaytib kelgan. Keyin I.ni tashqariga chaqirib olib, ‘Sen nima uchun mening onamni so‘kding?!’, deya qo‘lidagi pichoqni uning chap ko‘kragiga ikki marta sanchgan. Pichoq zarbidan yerga yiqilgan I. shifokorlar ko‘rsatgan tibbiy yordamga qaramay vafot etgan”, — deyiladi viloyat IIB axborot xizmati xabarida.
Viloyat IIB boshlig‘i ishtirokidagi muhokamada ta’kidlanishicha, jinoyatning yuzaga kelishida bilyard o‘yinini tashkil qilgan fuqaroning ham aybi bor.
“Hali tadbirkorlik maqomini olmasdan, qurilishi tugallanmagan binoda bilyard o‘yinini tashkil etgan fuqaro ikki marotaba soliq organlari tomonidan ogohlantirilgan. Qolaversa, mahalla fuqarolar yig‘ini tomonidan ham bir necha bor ogohlantirilganiga qaramasdan, faoliyatini davom ettirgan”, — deya holatga munosabat bildirgan muhokamada so‘z olganlar.
Izoh (0)