Buxoro shahrida qurilayotgan ikki qavat binoning bir qismi qulab tushdi, deya xabar bermoqda “Daryo” muxbiri.
Ma’lum qilinishicha, 29-mart kuni soat 14:30 lar atrofida Buxorodagi 5-mikrorayonda (Orbita) qurilayotgan binoning bir qismi qulab tushgan.
Ushbu hodisaga binoning yaqin atrofida qazish ishlari olib borilayotgani sabab qilib ko‘rsatilgan.
Buxoro viloyati hamda Buxoro shahri hokimligi vakillari voqea joyiga yetib borgan. Buxoro shahar hokimi matbuot kotibi Rifat Elmurodovga ko‘ra, mazkur manzil avtomobillarni yuvish shoxobchasi. Shoxobchadan uncha uzoq bo‘lmagan manzilda ish boshlagan quruvchi tashkilot qurilish ishlari standartiga rioya qilmagan.
Birlamchi o‘rganuvlarga ko‘ra, holatning sodir bo‘lishida har ikki tadbirkor ham kamchilikka yo‘l qo‘ygani aniqlangan.
Hodisa oqibatida jabr ko‘rganlar haqida ma’lumot yo‘q. Holat o‘rganilmoqda.
Eslatib o‘tamiz, 10-yanvar kuni Jizzax shahrida qurilish yakunlanmagan olti qavatli binoning bir qismi qulab tushgan edi. Hodisa oqibatida uning yonidagi inshoot ham zarar ko‘rgan, hech kim tan jarohati olmagan. Ushbu hodisadan so‘ng jinoyat ishi qo‘zg‘atilgan, hukumat komissiyasi tuzilgan, keyinroq binoning qolgan qismi ham buzib tashlangan. Ushbu voqeaga munosabat bildirarkan, prezident Shavkat Mirziyoyev “Jizzax viloyatining qurilish bo‘yicha o‘rinbosari bizning siyosatimizga xiyonat qilgan”ini, “uning butun to‘dasiga qonuniy jazo ko‘rish kerak”ligini ta’kidlagan edi. Keyinroq Jizzax viloyati hokimi o‘rinbosari Akram Rahmonqulov ishdan olingani, unga nisbatan jinoyat ishi qo‘zg‘atilgani ma’lum bo‘ldi.
Avvalroq, 2019 yil avgustida Toshkentdagi Riviera savdo majmuasining qurilishida yuz bergan avariya oqibatida to‘rt kishi halok bo‘lgani, oktabrida Tashkent City’dagi obyektlardan birining qurilishida qatnashayotgan ishchi sakkizinchi qavatdan qulab qurbon bo‘lgani, dekabr oyida Yunusobod metro yo‘lining yangi stansiyalarini qurish vaqtida yuz bergan fojia oqibatida olti kishi vafot etgani haqida xabar berilgan edi. Shuningdek, Qibrayda beton zavodining devori qulashi oqibatida uch kishi, Qarshi shahrida qurilishi bitmagan binodagi temir-beton konstruksiyalari qulashi oqibatida bir kishi, Dehqonoboddagi qurilayotgan do‘konning beton plitalari qulashi oqibatida bir kishi halok bo‘lgan edi.
Izoh (0)