Бухорода қурилаётган бинонинг бир қисми қулаб тушди (фото)

Бухоро шаҳрида қурилаётган икки қават бинонинг бир қисми қулаб тушди, дея хабар бермоқда «Дарё» мухбири.

Маълум қилинишича, 29 март куни соат 14:30 лар атрофида Бухородаги 5-микрораёнда (Орбита) қурилаётган бинонинг бир қисми қулаб тушган.

Ушбу ҳодисага бинонинг яқин атрофида қазиш ишлари олиб борилаётгани сабаб қилиб кўрсатилган.

Бухоро вилояти ҳамда Бухоро шаҳри ҳокимлиги вакиллари воқеа жойига етиб борган. Бухоро шаҳар ҳокими матбуот котиби Рифат Элмуродовга кўра, мазкур манзил автомобилларни ювиш шохобчаси. Шохобчадан унча узоқ бўлмаган манзилда иш бошлаган қурувчи ташкилот қурилиш ишлари стандартига риоя қилмаган.

Бирламчи ўрганувларга кўра, ҳолатнинг содир бўлишида ҳар икки тадбиркор ҳам камчиликка йўл қўйгани аниқланган.

Ҳодиса оқибатида жабр кўрганлар ҳақида маълумот йўқ. Ҳолат ўрганилмоқда.

Эслатиб ўтамиз, 10 январь куни Жиззах шаҳрида қурилиш якунланмаган олти қаватли бинонинг бир қисми қулаб тушган эди. Ҳодиса оқибатида унинг ёнидаги иншоот ҳам зарар кўрган, ҳеч ким тан жароҳати олмаган. Ушбу ҳодисадан сўнг жиноят иши қўзғатилган, ҳукумат комиссияси тузилган, кейинроқ бинонинг қолган қисми ҳам бузиб ташланган. Ушбу воқеага муносабат билдираркан, президент Шавкат Мирзиёев «Жиззах вилоятининг қурилиш бўйича ўринбосари бизнинг сиёсатимизга хиёнат қилган»ини, «унинг бутун тўдасига қонуний жазо кўриш керак»лигини таъкидлаган эди. Кейинроқ Жиззах вилояти ҳокими ўринбосари Акрам Раҳмонқулов ишдан олингани, унга нисбатан жиноят иши қўзғатилгани маълум бўлди.

Аввалроқ, 2019 йил августида Тошкентдаги Riviera савдо мажмуасининг қурилишида юз берган авария оқибатида тўрт киши ҳалок бўлгани, октябрида Tashkent City’даги объектлардан бирининг қурилишида қатнашаётган ишчи саккизинчи қаватдан қулаб қурбон бўлгани, декабрь ойида Юнусобод метро йўлининг янги станцияларини қуриш вақтида юз берган фожиа оқибатида олти киши вафот этгани ҳақида хабар берилган эди. Шунингдек, Қибрайда бетон заводининг девори қулаши оқибатида уч киши, Қарши шаҳрида қурилиши битмаган бинодаги темир-бетон конструкциялари қулаши оқибатида бир киши, Деҳқонободдаги қурилаётган дўконнинг бетон плиталари қулаши оқибатида бир киши ҳалок бўлган эди.