“O‘zbekistondagi 2265 ta mahallada umuman suv yo‘q” — “O‘zsuvta’minot” raisi

26-mart kuni AOKAda bo‘lib o‘tgan matbuot anjumanida Uy-joy kommunal xizmat ko‘rsatish vazirining birinchi o‘rinbosari, “O‘zsuvta’minot” AJ raisi Sohib Saifnazarov O‘zbekistonda suv ta’minoti masalasi haqida gapirdi, deb xabar bermoqda Repost.

Uning aytishicha, respublikadagi 10 271 ta mahalla o‘rganilganda, ularning 8006 tasida suv bilan ta’minlangani, qolgan 2265 tasida esa umuman suv ta’minoti yo‘qligi aniqlangan.

“O‘zsuvta’minot” raisining ma’lum qilishicha, 117 ta obyektda qurilish-montaj ishlarini bajarish uchun 1,1 trillion so‘m mablag‘ ajratildi va ushbu mablag‘lar hisobidan 2 ming kilometrdan ortiq ichimlik suvi tarmog‘i quriladi. Natijada 694 ta aholi punktida yashovchi 876 ming kishi birinchi marta markazlashtirilgan ichimlik suvi bilan ta’minlanadi, shuningdek, aholining 2 million nafaridada suv ta’minoti yaxshilanadi.

“Qarshida suv kunduzi va kechasi ikki soatdan berilardi. 2020-yili amalga oshirilgan ishlar natijasida 5 ta hududda 24 soat davomida suv etkazib beryapmiz”, — degan Sohib Saifnazarov.

Shuningdek, “O‘zsuvta’minot” AJ raisining ma’lum qilishicha, 2021-yilda Oqsuv–Dehqonobod suv quvuri qurilishi yakuniga yetkaziladi.  Dehqonobod tumani aholisining ichimlik suvi ta’minotini yaxshilash loyihasi doirasida 78,8 kilometr magistral suv tarmog‘i qurildi va viloyatning 116 ta qishloqlarida 112,8 mingdan ortiq aholi ichimlik suvi bilan ta’minlandi.

Bundan tashqari, hozirgi kunda Jizzax viloyatining Zarafshon daryosida quvvati sutkasiga 100 ming kub metr bo‘lgan suv ko‘tarish nasos stansiyasi va sutkasiga 100 ming kub metr suv tozalash quvvatiga ega “Uzunbuloq” suv tozalash stansiyasi qurilmoqda.

Matbuot anjumanida ta’kidlanishicha, 2021-yilda ichimlik suvi ta’minoti va kanalizatsiya tizimini yaxshilash bo‘yicha investitsiya loyihalari doirasida xalqaro moliya institutlari ishtirokida 250 million dollar jalb qilinadi. Bu mablag‘larga 346 kilometr ichimlik suvi ta’minoti quvurlari, 17 ta ichimlik suvi taqsimlash inshootlari, 29 ta suv omborlari, 10 ta suv quvurlari, 132 kilometr suv quvurlari, 3 ta oqava suv tozalash inshootlari va 21 ta oqava suv nasos stansiyalari quriladi.

Xususan, Jahon banki krediti hisobidan 139 million dollar ajratilgan “Buxoro viloyatining Olot va Qorako‘l tumanlari aholisini ichimlik suvi bilan ta’minlashni yaxshilash” loyihasi yakunlanadi.

Bundan tashqari, 2021-yilda “Obod qishloq” va “Obod mahalla” dasturlari doirasida respublika aholisini ichimlik suvi bilan ta’minlash bo‘yicha jami 545 ta loyiha amalga oshiriladi. Natijada 635 ming aholi ichimlik suvi bilan ta’minlandi va 1 milliondan ortiq kishi birinchi marta markazlashtirilgan ichimlik suvi bilan ta’minlanadi.