O‘zbekistonda elektromobillar uchun alohida farqlovchi ro‘yxatdan o‘tkazish davlat raqami belgilarini joriy etish taklif qilinmoqda. Bu haqdagi qaror loyihasi jamoatchilik uchun Ichki ishlar vazirligi tomonidan e’lon qilingan bo‘lib, uni muhokama qilish 11-aprelgacha davom etadi.
Hujjatda davlat raqamining hudud kodi ko‘rsatilgan qismi (01 — Toshkent, 10 — Toshkent viloyati, 20 — Sirdaryo viloyati va boshqalar) yashil rangda bo‘lishi ko‘zda tutilgan.
“Gazeta.uz”ning yozishicha, qonun loyihasiga ilova qilinadigan tushuntirish xatida kelgusida elektromobillar “butunlay ekologik xavfsizligini” hisobga olgan holda shaharlarning markaziy qismlariga kirishda imtiyozlarga ega bo‘lishi mumkinligi aytilgan.
Bundan tashqari, ularni davlat ro‘yxatiga olishda va texnik ko‘rikdan o‘tkazishda imtiyozlar va qulayliklar berilishi kutilmoqda.
Xabarda qayd etilishicha, elektromobillar uchun boshqa avtotransport vositalaridan faqr qiluvchi davlat raqami belgilaridan foydalanish turli mamlakatlarda joriy etilgan. Xususan, Janubiy Koreyada bunday raqamlar ko‘k rangli fonda berilgan.
Yangi davlat raqami belgilarini berish 1-iyundan boshlanishi kutilmoqda, ungacha elektromobillar raqamlari yangisiga bepul ravishda almashtiriladi.
Avvalroq O‘zbekistonda elektromobillar uchun yig‘im to‘lashni bekor qilish taklif etilgani haqida xabar berilgan edi. Ushbu yig‘imni bekor qilish Vazirlar Mahkamasining 2020-yil 29-dekabrdagi qarorida ko‘zda tutilgandi. Ayni paytda O‘zbekistonda elektromobillar importi boj va aksiz solig‘idan ozod qilingan.
Mavzuga doir:
Izoh (0)