Toshkent shahri Mirzo Ulug‘bek tumanida qalbaki dorilarni qadoqlab sotishga uringanlar aniqlandi, deya xabar bermoqda Davlat bojxona qo‘mitasi axborot xizmati.
Ma’lumotlarga ko‘ra, Davlat bojxona qo‘mitasi xodimlari tomonidan Mirzo Ulug‘bek tumanidagi xonadonlardan biri belgilangan tartibda ko‘zdan kechirilgan. Natijada bu xonadon o‘ziga xos yashirin savdo plaftormasi bo‘lib, unda Call-sentr tashkil qilingani hamda sotish uchun mo‘ljallab qo‘yilgan 96 622 dona dori vositasi, 72 902 quti biologik faol qo‘shimcha borligi aniqlandi.
O‘tkazilgan tezkor tadbir natijasida, ushbu xonadondan umumiy qiymati 9 milliard 179 million so‘mlik dori vositalari va biologik faol qo‘shimchalar hamda qadoqlovchi uskunalar, yarim tayyor mahsulotlar, yorliqlar, qo‘llash uchun yo‘riqnomalar va bo‘sh qutilar ashyoviy dalil sifatida olindi.
Hozirda mazkur holat yuzasidan surishtiruv harakatlari davom ettirilmoqda.
Bundan avval Toshkent va Bo‘stonliq tumanlarida dori vositalarini noqonuniy ravishda qariyb 470 million so‘mga sotganlar ushlangani, Toshkent viloyatida qariyb 1 milliard so‘mlik giyohvand va psixotrop dori vositalari noqonuniy aylanmasiga chek qo‘yilgani hamda Toshkent viloyatida dori vositalarini jami 34 ming dollarga noqonuniy ravishda sotayotgan shaxslar aniqlangani haqida xabar berilgandi.
Izoh (0)