O‘zbekistonda koronavirusga chalingani rasman tan olinganlar soni 82 340 nafarga yetdi. Sog‘liqni saqlash vazirligi ma’lumotlariga ko‘ra, 27-mart, shanba kuni mamlakatning 10 ta hududida jami 194 ta kasallanish holati qayd etilgan — bu 2021-yil hisobidan yangi antirekorddir. Bundan avvalgi eng yomon ko‘rsatkich (186 ta holat) bir kun avval — 26-mart kuni qayd etilgan edi.
Yangi kasallanish holatlarining:
- 1 tasi Andijon viloyatida,
- 4 tasi Buxoro viloyatida,
- 2 tasi Jizzax viloyatida,
- 4 tasi Namangan viloyatida,
- 10 tasi Samarqand viloyatida,
- 1 tasi Sirdaryo viloyatida,
- 3 tasi Farg‘ona viloyatida,
- 1 tasi Xorazm viloyatida,
- 16 tasi Toshkent viloyatida,
- 152 tasi Toshkent shahrida
“Shuningdek, 1 nafar koronavirusga chalingan bemor vafot etib, kasallikdan vafot etganlar soni 626 nafarga etdi”, — deyiladi SSV axborotida. Bu salkam bir yarim oy davom etgan “qurbonlarsiz davr”dan so‘ng e’lon qilingan to‘rtinchi o‘lim holatidir. Bundan avvalgi uchta o‘lim 23-mart, 24-mart va 26-mart kunlari ro‘yxatga olingan edi.
Ma’lumotlarga ko‘ra, o‘tgan bir sutka davomida Buxoro viloyatida 6 nafar, Farg‘ona viloyatida 7 nafar, Xorazm viloyatida 6 nafar, Toshkent viloyatida 15 nafar, Toshkent shahrida 129 nafar — respublika bo‘yicha jami 163 nafar bemor tuzalib, kasallikdan sog‘ayganlar soni rasman 80 523 nafarga yetgan, sog‘ayish ko‘rsatkichi — 98 foiz.“Ayni paytda tibbiyot muassasalarida davolanayotgan 1191 nafar bemordan 191 nafari og‘ir, 85 nafari esa o‘ta og‘ir ahvolda”, — deya qo‘shimcha qilingan SSV axborotida.
Eslatib o‘tamiz, O‘zbekistonda 1-apreldan boshlab koronavirusga qarshi karantin chora-tadbirlari nisbatan kuchaytiriladi.
Izoh (0)