Toshkentda 30 ming AQSh dollari evaziga tanishining sha’ni va qadr-qimmatini kamsituvchi ma’lumotlarni keng ommaga tarqatmasligini aytgan shaxs qamoqqa olindi, deya xabar bermoqda IIV.
Qayd etilishicha, 2021-yil 23-mart kuni IIVga fuqaro N.B. ariza bilan murojaat qilib, unda tanishi A.S. Telegram ijtimoiy tarmog‘i orqali uning sha’ni va qadr-qimmatini kamsituvchi ma’lumotlarni keng ommaga tarqatish bilan unga tahdid qilib, ushbu ma’lumotlarni tarqatmaslik evaziga 30 000 AQSh dollari berishini talab qilayotganligini ma’lum qilib, unga nisbatan qonuniy chora ko‘rishni so‘ragan.
Mazkur arizaga asosan, IIV Jinoyat qidiruv bosh boshqarmasi Korrupsiya va iqtisodiy jinoyatlarga qarshi kurashish boshqarmasi xodimlari tomonidan o‘tkazilgan tezkor tadbir davomida A.S. Yakkasaroy tumanidagi Muqimiy ko‘chasida fuqaro N.B.dan 30 000 AQSh dollarini olgan vaqtda ashyoviy dalillar bilan qo‘lga olingan.
Ushbu holat yuzasidan 2021-yil 23-mart kuni IIV huzuridagi Tergov departamenti tomonidan Jinoyat kodeksining 165-moddasi 3-qismi “a” bandi bilan jinoyat ishi qo‘zg‘atilib, A.S. ehtiyot chorasi tariqasida qamoqqa olingan.
Jinoyat ishi yuzasidan tergov harakatlari olib borilmoqda.
Bundan avval Chirchiqda 4 ming dollar evaziga o‘qishga kiritib qo‘yishni va’da qilgan kafedra mudiri ushlangani, Xorazmda ayolning shaxsiy videotasvirlarini qarindoshlariga ko‘rsatish bilan qo‘rqitib, undan 1,5 ming dollar va telefon talab qilgan yigit ushlangani hamda Sergelida 500 dollar evaziga avtomashina oynalari tusini o‘zgartirish uchun ruxsatnoma olib berishni va’da qilgan shaxslar ushlangani haqida xabar berilgandi.
Izoh (0)