Ўзбекистонда электромобиллар учун алоҳида фарқловчи рўйхатдан ўтказиш давлат рақами белгиларини жорий этиш таклиф қилинмоқда. Бу ҳақдаги қарор лойиҳаси жамоатчилик учун Ички ишлар вазирлиги томонидан эълон қилинган бўлиб, уни муҳокама қилиш 11 апрелгача давом этади.
Ҳужжатда давлат рақамининг ҳудуд коди кўрсатилган қисми (01 — Тошкент, 10 — Тошкент вилояти, 20 — Сирдарё вилояти ва бошқалар) яшил рангда бўлиши кўзда тутилган.
«Gazeta.uz»нинг ёзишича, қонун лойиҳасига илова қилинадиган тушунтириш хатида келгусида электромобиллар «бутунлай экологик хавфсизлигини» ҳисобга олган ҳолда шаҳарларнинг марказий қисмларига киришда имтиёзларга эга бўлиши мумкинлиги айтилган.
Бундан ташқари, уларни давлат рўйхатига олишда ва техник кўрикдан ўтказишда имтиёзлар ва қулайликлар берилиши кутилмоқда.
Хабарда қайд этилишича, электромобиллар учун бошқа автотранспорт воситаларидан фақр қилувчи давлат рақами белгиларидан фойдаланиш турли мамлакатларда жорий этилган. Хусусан, Жанубий Кореяда бундай рақамлар кўк рангли фонда берилган.
Янги давлат рақами белгиларини бериш 1 июндан бошланиши кутилмоқда, унгача электромобиллар рақамлари янгисига бепул равишда алмаштирилади.
Аввалроқ Ўзбекистонда электромобиллар учун йиғим тўлашни бекор қилиш таклиф этилгани ҳақида хабар берилган эди. Ушбу йиғимни бекор қилиш Вазирлар Маҳкамасининг 2020 йил 29 декабрдаги қарорида кўзда тутилганди. Айни пайтда Ўзбекистонда электромобиллар импорти бож ва акциз солиғидан озод қилинган.
Изоҳ (0)