Namangan shahrining Davlatobod tumanidagi yangi kutubxonada Namangan Smart City loyihasining taqdimoti bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Loyihani uni tayyorlash bilan shug‘ullangan Turkiyaning Studio Vertebra kompaniyasi vakillari taqdim etdi. Taqdimotga xorijiy investorlar, mahalliy quruvchi va tadbirkorlar taklif etildi.
Umumiy maydoni 558 gektardan iborat “aqlli shahar”ning yarmini yashil hududlar tashkil etishi ko‘zda tutilgan.
Bu yerda 9, 12 va 16 qavatli uylar, ma’muriy binolar, bank va ofislar, mehmonxonalar, o‘quv yurtlari, kutubxona, maktab, bolalar bog‘chasi va klinikalar, sport maydonlari, parklar va xiyobonlar o‘rin olishi rejalashtirilgan.
Davlatobodning To‘raqo‘rg‘on tumani bilan tutash hududida qad rostlaydigan yangi shaharchada kelgusida 100 mingga yaqin odam istiqomat qilishi, 60 mingdan ortiq ish o‘rni yaratilishi mo‘ljallanmoqda.
— Namangan shahrida hozir ham katta qurilishlar ketyapti. Lekin viloyat markazida yer tanqisligi bizga ko‘p pand berayotgan edi. Endi quruvchilarimiz va tadbirkorlarimizning salohiyatini yangi loyihaga yo‘naltirish, hamyurtlarimizning yashash sharoitlarini yanada yaxshilash imkoniyati tug‘ilmoqda, — dedi taqdimotda ishtirok etgan viloyat hokimi Shavkatjon Abdurazzoqov.
Eslatib o‘tamiz, oldinroq Namangan shahri markazida barpo etilishi rejalashtirilgan Namangan City loyihasi bekor qilingani, yangi qurilishlar shaharga qo‘shib berilgan hududlarda olib borilishi ma’lum qilingandi.
Izoh (0)