Наманган шаҳрининг Давлатобод туманидаги янги кутубхонада Namangan Smart City лойиҳасининг тақдимоти бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Лойиҳани уни тайёрлаш билан шуғулланган Туркиянинг Studio Vertebra компанияси вакиллари тақдим этди. Тақдимотга хорижий инвесторлар, маҳаллий қурувчи ва тадбиркорлар таклиф этилди.
Умумий майдони 558 гектардан иборат «ақлли шаҳар»нинг ярмини яшил ҳудудлар ташкил этиши кўзда тутилган.
Бу ерда 9, 12 ва 16 қаватли уйлар, маъмурий бинолар, банк ва офислар, меҳмонхоналар, ўқув юртлари, кутубхона, мактаб, болалар боғчаси ва клиникалар, спорт майдонлари, парклар ва хиёбонлар ўрин олиши режалаштирилган.
Давлатободнинг Тўрақўрғон тумани билан туташ ҳудудида қад ростлайдиган янги шаҳарчада келгусида 100 мингга яқин одам истиқомат қилиши, 60 мингдан ортиқ иш ўрни яратилиши мўлжалланмоқда.
— Наманган шаҳрида ҳозир ҳам катта қурилишлар кетяпти. Лекин вилоят марказида ер танқислиги бизга кўп панд бераётган эди. Энди қурувчиларимиз ва тадбиркорларимизнинг салоҳиятини янги лойиҳага йўналтириш, ҳамюртларимизнинг яшаш шароитларини янада яхшилаш имконияти туғилмоқда, — деди тақдимотда иштирок этган вилоят ҳокими Шавкатжон Абдураззоқов.
Эслатиб ўтамиз, олдинроқ Наманган шаҳри марказида барпо этилиши режалаштирилган Namangan City лойиҳаси бекор қилингани, янги қурилишлар шаҳарга қўшиб берилган ҳудудларда олиб борилиши маълум қилинганди.
Изоҳ (0)