Yaponiyaning O‘zbekistondagi elchisi Yoshinori Fujiyama va O‘zbekiston moliya vaziri o‘rinbosari Odilbek Isoqov 26-mart kuni umumiy qiymayi 15 milliard iyena (136,5 million dollar)ni tashkil etuvchi almashinuv notalarini imzoladi. Bu haqda Yaponiyaning O‘zbekistondagi elchixonasi matbuot xizmati xabar berdi.
Ma’lum qilinishicha, ushbu mablag‘ 0,01 foiz foiz stavka va 15 yillik muddati bilan taqdim etilgan. Uning 4 yili imtiyozli davr hisoblanib, O‘zbekistonga COVID-19 inqirozining oqibatlari bilan kurashish uchun moliyaviy ko‘mak tarzida ajratilgan.
“Koronavirus pandemiyasi tufayli iqtisodiy va ijtimoiy faoliyat, jumladan, gumanitar almashinuv va logistika global miqyosda to‘xtab qolmoqda. Bu butun xalqaro hamjamiyat, shu jumladan, Yaponiya ham pandemiya tugaganidan so‘ng o‘zaro birgalikda salbiy ta’sirlarni yengib o‘tish va rivojlanishga olib borish uchun birgalikda hal qilish kerak bo‘lgan muammo”, — deyiladi xabarda.
Avvalroq O‘zbekiston Yaponiya xalqaro hamkorlik agentligi (JICA)dan jami qiymati 333,4 million dollar bo‘lgan ikkita kredit jalb qilishni rejalashtirayotgani to‘g‘risida xabar berilgandi.
Hujjat loyihasiga ko‘ra, JICA quyidagi qarz mablag‘larini ajratishga rozilik bildirgan:
- O‘zbekistonda koronavirus pandemiyasi oqibatlariga qarshi choralar ko‘rish uchun — 15 milliard yapon iyenasi miqdoridagi mablag‘larni 15 yil muddatga, shu jumladan, 4 yillik imtiyozli davr bilan yillik 0,01 foizda;
- “Rivojlantirish siyosatini qo‘llab-quvvatlash” loyihasini amalga oshirish uchun — 195 million dollarni 25 yil muddatga, shu jumladan, 7 yillik imtiyozli davr bilan Libor stavkasi (6 oylik) bo‘yicha + yillik 1,1 foizda.
Izoh (0)