Zangiota yuqumli kasalliklar shifoxonasida koronavirusdan davolanayotgan 99 yoshli fuqaro sog‘ayib chiqdi, deya xabar bermoqda Sog‘liqni saqlash vazirligi.
Ma’lum qilinishicha, 2021-yilning 14-mart kuni Zangiota yuqumli kasalliklar shifoxonasiga 1922-yilda tug‘ilgan fuqaro T.T. koronavirus tashxisi bilan olib kelingan.
Bemorda o‘tkazilgan PZR testi natijalari musbat chiqqan, rentgen tekshiruvlarida ikki tomonlama gidrotoraks suyuqlik aniqlangan.
“Davolash jarayonida torakal jarrohlik yo‘li bilan bemorning o‘pkasidan 10 kun davomida 4 marta, jami 2 litr suyuqlik olindi. Bemor kichik operatsiyadan ham muvaffaqiyatli chiqdi, ikki hafta davomida intensiv davo muolajalari o‘tkazildi. Shu tarzda bemorning ahvoli ijobiy tomonga o‘zgara boshladi. Nihoyat, muolajalardan so‘ng olingan PZR testi manfiy natijani ko‘rsatdi”, — deydi shifoxonaning reanimatsiya bo‘limi mudiri Dono Jo‘lamanova.
Bundan tashqari, bemorda hamroh kasalliklar ham mavjud bo‘lgan. Bemordagi yurak yetishmovchiligi asoratlari ham tezda bartaraf etilgan.
Ta’kidlanishicha, onaxon uyiga ketishi uchun javob berilgan.
Eslatib o‘tamiz, O‘zbekistonda 25-mart, payshanba kuni 144 kishida koronavirus infeksiyasi tasdiqlandi. Ushbu bir sutka davomida Qoraqalpog‘istonda bir kishi, Toshkent viloyatida 21 kishi, Toshkent shahrida esa 83 kishi, respublika bo‘yicha jami 105 kishi COVID-19 kasalligidan sog‘aygan. Sog‘ayish ko‘rsatkichi 98 foizni tashkil etmoqda.
Koronavirus keng tarqalishining oldini olish maqsadida Toshkentdagi ayrim maktablarda o‘qish bosqichma-bosqich masofaviy shaklga o‘tkazilmoqda, bozor va savdo markazlarida karantin talablari kuchaytirildi.
Toshkent shahridagi taksi va qurilish sohasida karantin choralari kuchaytirilishi, poytaxt hokimligi va uning tizimidagi barcha tuzilmalarda turli yig‘ilishlarni o‘tkazish taqiqlangani haqida xabar berildi.
Shuningdek, O‘zbekistonda 1-apreldan ommaviy tadbirlar o‘tkazishga ayrim cheklovlar o‘rnatiladi. To‘ylarda mehmonlar soni cheklanadi. Bundan tashqari, SSV 24-mart kuni 10-fevraldan beri birinchi marta O‘zbekistonda koronavirus oqibatida bemor vafot etgani haqida axborot berdi.
Izoh (0)