Toshkent viloyati Zangiota tumanida 19 yoshli qizning telefon, taqinchoq va pullarini bosqinchilik yo‘li bilan o‘marib ketgan shaxs qo‘lga olindi, deya xabar bermoqda Tergov departamenti.
Qayd etilishicha, 2021-yilning 15-mart kuni soat 19:00 larda Nexia-2 rusumli avtomashina haydovchisi bo‘lgan noma’lum shaxs Zangiota tumani “Xonobod” MFYdan 19 yoshli Z.A.ni “Bek Baraka” savdo majmuasiga 30 000 so‘m evaziga olib borib qo‘yish maqsadida mijoz sifatida olgan.
So‘ngra haydovchi qizni Zangiota tumani “O‘rtaovul” MFY hududidagi kimsasiz joyga olib borib, qo‘lidagi pichoqchani tirab, qo‘rqitgan. U qizning LG rusumli telefon apparati, bir juft tilla ziragi, 150 000 so‘m pul mablag‘larini bosqinchilik yo‘li bilan olib, hodisa joyidan qochib ketgan.
Olib borilgan tezkor qidiruv harakatlari davomida ushbu jinoyatni 34 yoshli J.X. sodir etganligi, qurol sifatida foydalangan pichoqcha tirnoq olish uchun mo‘ljallangan “kusachka” ekanligi aniqlangan.
Mazkur holat yuzasidan Zangiota tumani IIB huzuridagi tergov bo‘limi tomonidan J.X.ga nisbatan Jinoyat kodeksining 164-moddasi 2-qismi “a” bandi (qurol yoki qurol sifatida foydalanish mumkin bo‘lgan boshqa narsalarni ishlatib, bosqinchilik qilish) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Hozirda tergov davom etmoqda, deyiladi xabarda.
Ma’lumot uchun, bu turdagi jinoyatlar uchun Jinoyat kodeksining normalariga ko‘ra, 8 yildan 10 yilgacha ozodlikdan mahrum qilish jazosi tayinlanadi.
Bundan avval Toshkentda 8 oylik o‘g‘lini 10 ming dollarga sotishga uringan ayol qo‘lga olingani, Farg‘onada Navro‘z bayramida talonchilik sodir etgan shaxslar ushlangani hamda Samarqandda qizining sha’nini bulg‘ovchi gap-so‘zlarni tarqatgan erkakni kaltaklagan otaga nisbatan jinoyat ishi qo‘zg‘atilgani haqida xabar berilgandi.
Izoh (0)