Qoraqalpog‘istonda bolalar uyda yolg‘izligidan foydalanib, ularni aldab tunda xonadonga kirib, talonchilik sodir etgan shaxslar ushlandi, deya xabar bermoqda Tergov departamenti.
Ma’lum qilinishicha, 2021-yilning 8-mart kuni tungi soat 03:30 larda noma’lum shaxslar Nukus shahar 22-kichik tumanida yashovchi 40 yoshli M.K.ning yashash xonadonida voyaga yetmagan 11 yoshli Q.K. va 7 yoshli A.K. uyda yolg‘iz o‘tirganliklaridan foydalanib, ularga “onangiz pittsa berib yubordi” deb, xonadon eshigini ochtirgan.
Uch nafar shaxs bolalarning qarshiliklariga qaramasdan ushbu xonadonga g‘ayriqonuniy ravishda kirib, jami 25 000 000 so‘mlik tilla taqinchoqlarni talonchilik yo‘li bilan qo‘lga kiritib, hodisa joyidan yashiringan.
Olib borilgan tergovga qadar tekshiruv harakatlari davomida ushbu jinoyatni Samarqand viloyatidan Nukus shahriga ishlash maqsadida kelgan fuqarolar 25 yoshli Sh.Sh., 22 yoshli O.B. va 24 yoshli Sh.A. sodir etgani aniqlangan.
Mazkur holat yuzasidan Nukus shahar IIO FMB huzuridagi tergov bo‘linmasi tomonidan Sh.Sh., O.B. va Sh.A.ga nisbatan Jinoyat kodeksining 166-moddasi 3-qismi “b” (uy-joyga g‘ayriqonuniy ravishda kirib, sodir etilgan talonchilik) bandi bilan jinoyat ishi qo‘zg‘atilib, protsessual tartibda ushlangan. Hozirda tergov davom etmoqda.
Ma’lumot uchun, bu turdagi jinoyatlar uchun Jinoyat kodeksining normalariga ko‘ra, 5 yildan 10 yilgacha ozodlikdan mahrum qilish jazosi tayinlanadi.
Avvalroq Farg‘onada Navro‘z bayramida talonchilik sodir etgan shaxslar ushlangani, Samarqandda bolg‘a bilan ota-bolani o‘ldirib, ularning uyini talon-toroj qilgan erkak 22 yilga qamalgani hamda Yunusoboddagi kafedan ichida 15 million so‘m bo‘lgan seyfni o‘g‘irlamoqchi bo‘lgan shaxs voqea joyida qo‘lga olingani haqida xabar berilgandi.
Izoh (0)