“Davlat xizmatchilarining daromadlari, mol-mulki va manfaatlar to‘qnashuvini deklaratsiya qilish to‘g‘risida”gi qonun loyihasi O‘zbekiston Respublikasi Prezidenti Administratsiyasiga kiritildi. Bu haqda Korrupsiyaga qarshi kurashish agentligi matbuot xizmati “Daryo”ga ma’lum qildi.
Eslatib o‘tamiz, 2019-yilning oktabr oyida 2020-yilning 1-yanvaridan boshlab O‘zbekistonda davlat xizmatchilari ayrim toifalarining mol-mulkini, daromadlari va xarajatlarini deklaratsiyalash tizimini bosqichma-bosqich joriy etishga qaratilgan Prezident qarori loyihasi jamoatchilik muhokamasiga qo‘yilgandi. Qarorga ko‘ra, davlat xizmatchilarining mol-mulkini, daromadlarini va xarajatlarini deklaratsiyalashning yagona axborot tizimini joriy etish rejalashtirilgan edi. U 2020—2022-yillar davomida bosqichma-bosqich, ya’ni 2020-yildan Oliy Majlis Qonunchilik palatasi spikeri va Senati raisi va ularning o‘rinbosarlari, bosh vazir o‘rinbosarlari, bosh vazir o‘rinbosarlari maslahatchilari, 2021-yildan esa vazirlik va idoralarning tarkibiy bo‘linmalari boshliqlari, shuningdek, ularning o‘rinbosarlari daromad va mol-mulkini deklaratsiyalash bayon etilgan. Lekin ushbu qaror loyihasida Prezident va bosh vazirning daromadlar deklaratsiyasini to‘ldirishi nazarda tutilmagandi. Mazkur qaror loyihasining keyingi taqdiri haqida ma’lumot taqdim etilmagan.
Oradan roppa-rosa bir yil o‘tgandan so‘ng, ya’ni 2020-yilning oktabr oyida Korrupsiyaga qarshi kurashish agentligi direktori Akmal Burhonov davlat xizmatchilari daromadlarini deklaratsiya qilish tizimi 2021-yil yanvardan boshlanishini e’lon qilgan edi. O‘shanda Akmal Burhonov ushbu amaliyot 5 yil ichida tatbiq etilishi, bu bo‘yicha qonun loyihasi tez orada jamoatchilik muhokamasiga qo‘yilishini aytgandi.
Qonunda kimlar deklaratsiyalanishi kerak, qaysi mansabdorlar, ularning nimalarini deklaratsiya qilish kerak, qanday nazorat qilinadi, deklaratsiya noto‘g‘ri to‘ldirilsa, qanday javobgarlik choralari belgilash kerak, qanday huquqiy oqibatlarga olib kelishi va hokazolarning barchasi aks ettirilishi ta’kidlangandi. Nafaqat qonun loyihasi, balki tizim, monitoring tizimi, deklaratsiyalarni to‘ldirish tizimining onlayn platformasi ustida ish olib borilayotgani zikr etilgandi. Ammo aytilga sana kelsa-da, qonun loyihasi ham, deklaratsiyalarni to‘ldirish tizimi ham ishga tushmadi.
O‘shanda mazkur qonun loyihasi tegishli organlarga kelishish uchun kiritilgani, kelishish jarayonida tegishli xulosalar kutilayotgani aytilgan.
E’tiborli jihati shundaki, mazkur qonun loyihasida avvalgilaridan farqli ravishda O‘zbekistonda Prezident ham, bosh vazir ham yil davomida ishlab topgan puli haqida hisobot topshirish majburiyati yuklatilishi mumkinligi bayon etilgan. Shuningdek, mansab vakolatiga tegishli bo‘lgan, hujjat qabul qilish vakolati bo‘lgan barcha mansabdor shaxslar — quyidan tortib, yuqorigacha bo‘lgan mansabdor shaxslar doirasi qamrab olingan. Bular:
- Prezident Adminstratsiyasi;
- Vazirlar Mahkamasi;
- respublika tashkilotlari;
- hokimliklar;
- huquqni muhofaza qiluvchi organlar;
- sud idoralari xodimlari daromadlar deklaratsiyasini to‘ldirishi taklif etilgan.
Bosh vazir o‘rinbosarlari, vazirlar-u, idora rahbarlari va hokimlarning mazkur qonunning joriy etilishiga nisbatan bildirgan fikrlari bilan tanishing:
- “Buning nimasidan qo‘rqish kerak?”. O‘zbekiston hukumati a’zolari daromadlarni deklaratsiya qilish to‘g‘risidagi qonun loyihasiga ijobiy munosabatda
- “Tezroq amaliyotga joriy qilish kerak”. DSQ, Markaziy bank, Moliya va Iqtisodiyot vazirliklari mas’ullari — daromadlar deklaratsiyasiga doir qonun loyihasi haqida
- “Amaldorlarning qanday soat taqishigacha nazorat qilish lozim”. Bosh vazir o‘rinbosarlari — daromadlar deklaratsiyasiga doir qonun loyihasi haqida
- “Hisobga olinmagan daromadlar masalasi hal qilinmasa, bu tashabbus ishlab ketishiga ishonmayman”. Sudyalar Oliy kengashi raisi — daromadlar deklaratsiyasiga doir qonun loyihasi haqida
- “Qo‘sha-qo‘sha ortiqcha uylar va biznes loyihalar qilolmaganmiz”. Ayol hokimlar daromadlar deklaratsiyasiga doir qonun loyihasi haqida
Izoh (0)