Qo‘qon shahrida qalbaki 100 dollarlik kupyura tayyorlab, uni muomalaga kiritmoqchi bo‘lgan shaxs ushlandi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, 2021-yilning 14-mart kuni Qo‘qon shahrida noma’lum shaxs savdo do‘koniga kirib, umumiy narxi 110 ming so‘mlik spirtli ichimlik va boshqa turdagi mahsulotlarni xarid qilgan.
Savdogarga qalbaki usulda tayyorlangan 100 dollarni berib, 935 ming so‘mni qaytim sifatida olib, hodisa joyidan yashiringan. Bu haqda do‘kon egasi IIBga ariza bilan murojaat qilgan.
O‘tkazilgan sudga oid texnik-kriminalistik ekspertizaning xulosasiga ko‘ra, 1 dona 100 dollar qiymatidagi kupyura qalbaki usulda rangli printer yordamida tayyorlanganligi aniqlangan.
Mazkur holat yuzasidan Qo‘qon shahar IIO FMB huzuridagi tergov bo‘limi tomonidan Jinoyat kodeksining 176-moddasi 1-qismi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilgan.
Olib borilgan tergovga qadar tekshiruv davomida qalbaki kupyura Yu.M. tomonidan tayyorlanganligi aniqlanib, unga nisbatan sud tomonidan qamoqqa olish tarzidagi ehtiyot chorasi qo‘llanilgan.
Izoh (0)