Навоий вилоятининг Кармана туманидаги «Алишер Навоий» маҳалла фуқаролар йиғинида яшовчи ва чиқиндихоналарда тирикчилик қилиб келаётган шахс шеригини дўппослаб ўлдириб қўйди. Навоий вилоят ИИБ ахборот хизмати раҳбари Ўктам Усмоновнинг «Дарё»га хабар беришича, воқеа 2021 йилнинг 23 март куни тунда содир бўлгани боис фуқаронинг ўлгани бир кундан кейин аниқланган.
Таъкидланишича, 49 ёшли фуқаро Р.И. ҳамда 32 ёшли М.Ч. чиқиндихоналардаги пластмасса идиш ва картон қоғозларни тўплаб, сотиш орқали тирикчилик қилиб келган. Маҳалла вакиллари ҳамда профилактика инспектори ҳам уларнинг доимий равишда спиртли ичимлик истеъмол қилиб юришидан хабардор бўлган.
Маълум бўлишича, 2021 йилнинг 23 март куни фуқаро Р.И. шериги М.Ч.нинг яшаш хонадонига борган. Улар кунбўйи спиртли ичимлик истеъмол қилган. Маст ҳолда жанжаллашган танишлар бир-бирини дўппослаган. Р.И. шериги М.Ч.га ҳаёти ва соғлиғи учун хавфли бўлган тан жароҳатлари етказган. М.Ч. ҳушидан кетиб йиқилгач, маст ҳолатдаги Р.И. унинг хонадонидан чиқиб кетган. Хонадон дарвозаси очиқ қолдирилган.
24 март, чоршанба куни эрталаб ҳудуд профилактика инспектори фуқаро М.Ч.нинг хонадон дарвозаси очиқ қолганини кўрган. Шундан сўнг фуқарога оғир тан жароҳати етказилгани, биринчи тез тиббий ёрдам кўрсатилмагани оқибатида вафот этгани аниқланган.
Кармана туман ички ишлар бўлими ходимлари томонидан олиб борилган тезкор суриштирув ишлари давомида фуқаро М.Ч.нинг ҳаётига унинг шериги Р.И.нинг суиқасд қилгани ойдинлашган.
Мазкур ҳолат вилоят прокуратураси, вилоят ИИБ, туман сектор раҳбарлари ҳамда кенг жамоатчилик иштирокида муҳокама қилинган.
«Қўни-қўшнилар, маҳалла аҳолиси ўртасидаги бефарқлик, кўриб-кўрмасликка олиш — содир бўлаётган жиноятларга шериклик, дегани. Маҳалла раиси ҳамда ҳудуд профилактика инспекторининг айтишича, гўёки хонадонда соғлом муҳит мавжуд экан. Мунтазам равишда чиқинди ва макалатура сотиш билан тирикчилик қилаётган, ҳар доим спиртли ичимлик истеъмол қилиб юришганини кўришган бўлса, буни қандай қилиб оиладаги соғлом муҳит деб баҳолаш мумкин?! Мана шундай эътиборсизлик, лоқайдлик, бефарқлик оқибатида инсон жиноятга қўл урмоқда. Профилактик тадбирлар ўтказиш, тушунтириш ишлари олиб бориш билан масала ҳал бўлмайди. Ачинарлиси, фуқаронинг ҳовлиси ахлатхона чиқиндилари билан тўла, атроф бижғиб ётибди. Қани маҳалла-кўй, қани санитария ва эпидемиология вакиллари? Махсус автохўжалик ташкилоти ходимлари ахлатхоналардамас, хонадонларда тўпланаётган чиқиндиларни кўришмаяптими?! Ҳар бир ҳолат ортида инсон тақдири ётибди. Демак, ҳудудлардаги кримоген вазиятларни тўлиқ назоратга олиш ҳар бир ходимнинг бурчи», — деди муҳокамада сўз олган вилоят ИИБ бошлиғининг биринчи ўринбосари, полковник Илҳом Тиллаев.
Қўшимча қилинишича, Кармана туман ички ишлар бўлими ҳузуридаги тергов бўлими томонидан И.Р.га нисбатан Жиноят кодексининг 104-моддаси (қасддан баданга оғир шикаст етказиш) билан жиноят иши қўзғатилган.
Изоҳ (0)