Prezidentning 19-martdagi qarori bilan 2021—2023-yillarda fizika fanlari bo‘yicha ta’lim sifatini oshirish va fizika sohasidagi ilmiy tadqiqotlarning natijadorligini ta’minlash bo‘yicha kompleks chora-tadbirlar dasturi tasdiqlandi. Bu haqda Adliya vazirligi matbuot xizmati xabar berdi.
Dastur bilan respublika hududlarida fizika faniga ixtisoslashtirilgan jami 28 ta tayanch maktabini bosqichma-bosqich tashkil etish rejalashtirilgan. Ularga tegishli OTMning kafedralari biriktiriladi. 175 ta maktabda fizika fani chuqurlashtirib o‘qitiladigan sinflar tashkil etiladi.
2021/2022-o‘quv yilidan umumiy o‘rta ta’lim muassasalarida fizika fani kengroq o‘qitiladigan variativ o‘quv rejasi joriy qilinadi. Ixtisoslashtirilgan maktablarda fizika fani tayanch o‘quv rejada belgilangan o‘quv soatlar doirasida haftasiga 3 soatdan o‘qitiladi.
Shuningdek, yangi o‘quv yilidan 20 ta umumta’lim muassasasida tajriba-sinov tariqasida “virtual laboratoriya” loyihasi ta’lim jarayoniga tatbiq etiladi.
2022-yil 1-yanvargacha Qoraqalpog‘iston Respublikasi, viloyatlar va Toshkent shahridagi bittadan “Barkamol avlod” bolalar maktablarida STEM fizika klublari tashkil etiladi. Shu muddatga qadar fizika fanidan bilimlarni baholash bo‘yicha milliy sertifikatlash tizimi joriy qilinadi.
2022-yil 1-sentabrdan ixtisoslashtirilgan maktablarning fizika fani bo‘yicha milliy sertifikatlash tizimida maksimal ballning 70 va undan yuqori foizini to‘plagan fizika fani o‘qituvchilariga bazaviy tarif stavkasiga nisbatan har oylik ustama haqi 50 foiz miqdorida to‘lanadi.
Izoh (0)