Farg‘ona viloyatida YPX inspektoriga pora taklif qilgan shaxs qo‘lga olindi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, 2021-yilning 15-mart kuni fuqaro S.O‘. O‘zbekiston tumani IIB YHXB inspektori A.D.ga murojaat qilib, IJ-412 rusumli avtomashinasini mast holatda boshqarganligi uchun o‘ziga nisbatan rasmiylashtirilgan ma’muriy bayonnomani sudga yubormaslik va ijobiy hal qilib berish evaziga 100 dollar va 500 ming so‘m miqdoridagi pullarni pora tariqasida taklif qilgan.
Inspektor fuqaroni pora berish jinoyat ekanligi haqida bir necha marotaba ogohlantirib, bu yo‘ldan qaytarishga harakat qilgan bo‘lishiga qaramay, fuqaro pora taklif qilishda davom etgan.
Shundan so‘ng YPX xodimi mazkur holat yuzasidan IIB boshlig‘i nomiga bildirgi orqali murojaat qilib, fuqaro S.O‘.ga nisbatan belgilangan tartibda chora ko‘rilishini so‘ragan.
Holat yuzasidan IIV O‘XB Farg‘ona viloyati bo‘yicha bo‘limi hamda Bosh prokuratura huzuridagi iqtisodiy jinoyatlarga qarshi kurashish departamenti va O‘zbekiston tumani IIB xodimlari bilan hamkorlikda o‘tkazilgan tezkor tadbir davomida fuqaro S.O‘. 100 dollar va 450 ming so‘mni pora tariqasida YPX xodimiga bergan vaqtida ushlangan. Pullar xolislar ishtirokida daliliy ashyo tariqasida rasmiylashtirib olingan.
Voqea yuzasidan tegishli tartibda protsessual hujjatlar rasmiylashtirilib, O‘zbekiston tumani Iqtisodiy jinoyatlarga qarshi kurashish departamentiga yuborilgan.
Mavzuga doir:
- Samarqandda harbiy xizmatga jo‘natishni va unda qolish masalasini hal qilishni va’da berib, fuqarodan 3 500 dollar olgan shaxsga nisbatan jinoiy ish ochildi
- Farg‘onada ichki ishlar organlariga ishga kiritib qo‘yish uchun ayoldan 2 ming dollar talab qilganlar qo‘lga olindi
- Sergelida 500 dollar evaziga avtomashina oynalari tusini o‘zgartirish uchun ruxsatnoma olib berishni va’da qilgan shaxslar ushlandi
Izoh (0)