Quvasoy shahri va Bag‘dod tumaniga yangi prokurorlar tayinlandi

Farg‘ona viloyatining Quvasoy shahri va Bag‘dod tumaniga yangi prokurorlar tayinlandi, deya xabar berdi “Daryo” muxbiri.

Ma’lum qilinishicha, Bosh prokuraturaning murojaatlar bilan ishlash boshqarmasi boshlig‘i o‘rinbosari Madumarov Sherzod Gulamaliyevich Quvasoy shahri prokurori etib tayinlangan.

Sherzod Madumarov 1974-yilda Marg‘ilon shahrida tug‘ilgan bo‘lib, Farg‘ona davlat universiteti hamda Toshkent davlat yuridik institutini tamomlagan. 2002—2018-yillarda Farg‘ona viloyati va Toshkent shahridagi prokuratura organlarida turli lavozimlarda faoliyat olib borgan.

2018—2019-yillarda O‘zbekiston Respublikasi Bosh prokuraturasi murojaatlar bilan ishlash boshqarmasi prokurori, katta prokurori, 2019—2021-yillarda esa Bosh prokuraturaning murojaatlar bilan ishlash boshqarmasi boshlig‘ining o‘rinbosari lavozimida ishlagan.

Shuningdek, Bosh prokuratura boshqarma boshlig‘ining o‘rinbosari Fozilov Akmal Murotovich Bag‘dod tumani prokurori etib tayinlangan.

Akmal Fozilov 1987-yil Uchko‘prik tumanida tug‘ilgan bo‘lib, Namangan davlat universiteti va Bosh prokuratura akademiyasini tamomlagan.

2008—2014-yillar davomida Farg‘ona viloyati prokuraturasi organlarida, 2014—2018-yillarda O‘zbekiston Respublikasi Bosh prokuraturasida bo‘lim katta prokurori, bo‘lim boshlig‘i lavozimlarida faoliyat yuritgan.

2018—2021-yillarda O‘zbekiston Respublikasi Bosh prokuraturasida fuqarolik sud ishlarini yuritishda prokuror vakolatini ta’minlash boshqarmasi boshlig‘i o‘rinbosari lavozimida ishlagan.